បាល់ទាត់៖ គណៈកម្មការរៀបចំការប្រកួតកីឡាបាល់ទាត់ជាតិកម្ពុជា (CNCC) បានបើកឱ្យអ្នកគាំទ្របាល់ទាត់ ៥០% នៃចំនួនកៅអីកីឡាដ្ឋានចូលរួមទស្សនាការប្រកួតកីឡាបាល់ទាត់ជម្រើសជើងឯកជាតិកម្ពុជា (មិត្តហ្វូនខាំបូឌានលីគ) និងការប្រកួតកីឡាបាល់ទាត់ពានរង្វាន់សម្ដេចអគ្គមហាសេនាបតីតេជោ ហ៊ុន សែន ២០២១ ពានថ្នាក់ជាតិ។
យោងតាមសេចក្តីជូនដំណឹងរបស់គណៈកម្មការប្រកួតកីឡាបាល់ទាត់ជាតិកម្ពុជាបញ្ជាក់ថា ការអនុញ្ញាតឱ្យទស្សនិកជនចូលរួមទស្សនាការប្រកួតនេះ ក្លិបបាល់ទាត់ទាំងអស់ត្រូវអនុវត្តនូវលក្ខខណ្ឌច្បាស់លាស់ ដូចជាអ្នកទស្សនាត្រូវចុះឈ្មោះជាមុនដោយកំណត់នូវទីតាំងកៅអីអង្គុយ និងអាសយដ្ឋានច្បាស់លាស់ទាំងលេខទូរស័ព្ទ, អ្នកទស្សនាត្រូវភ្ជាប់មកជាមួយនូវអត្តសញ្ញាណប័ណ្ណ និងប័ណ្ណចាក់វ៉ាក់សាំងប្រឆាំងជំងឺកូវីដ-១៩, ត្រូវធ្វើការវាស់កម្ដៅ និងសម្អាតអនាម័យដៃដោយអាល់កុល រឺជែលដល់ទស្សនិកជនទាំងអស់មុនអនុញ្ញាតឱ្យចូលបរិវេណកីឡដ្ឋាន, រក្សាគម្លាតសុវត្ថិភាព ០១ម៉ែត្រកន្លះពីមនុស្សម្នាក់ទៅមនុស្សម្នាក់ទៀត, ទស្សនិកជនត្រូវពាក់ម៉ាស់ជាប់ជាប្រចាំក្នុងកំឡុងពេលទស្សនាការប្រកួត, មិនអនុញ្ញាតឲ្យទស្សនិកជនដែលមានអាការៈសង្ស័យ រឺជំងឺផ្ដាសាយចូលទស្សនាការប្រកួតឡើយ។
គណៈកម្មការបានបញ្ជាក់បន្ថែមទៀតថា ក្លិបបាល់ទាត់ដែលមិនបានអនុវត្តតាមវិធានរបស់ក្រសួងសុខាភិបាល និងការណែនាំរបស់ CNCC និងមិនអនុញ្ញាតឱ្យមានទស្សនិកជនចូលរួមជាដាច់ខាត។ ក្នុងករណីការប្រកួតណាមួយរកឃើញទស្សនិកជនដែលមានវិជ្ជមាន ឬសង្ស័យមានជំងឺកូវីដ-១៩ ហើយនៅតែអនុញ្ញាតឱ្យចូលរួមទស្សនាការប្រកួតទៀតនោះ គណៈកម្មការនឹងធ្វើការផ្អាកជាបណ្ដោះអាសន្នដោយមិនឱ្យទស្សនិកជនចូលរួមទស្សនាការប្រកួតនោះ រហូតដល់មានការសម្រេចជាថ្មី៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
