រូបភាពនៃលោកតា សាន់តាក្លូស ដែលបានចេញដំណើរនៅមុនបុណ្យណូអែលលើរទេះរុញទាញដោយសត្វរមាំង ដើម្បីចែកអំណោយដែលបង្កប់ដោយក្ដីស្រឡាញ់ នៅជុំវិញពិភពលោក ត្រូវបានបង្ហាញឲ្យឃើញ ខណៈពិធីបុណ្យណូអែលបានចាប់ផ្ដើមហើយ។

រូបភាពនោះ គឺទទួលបានពីបញ្ជាការការពារដែនអាកាសអាមេរិកខាងជើង (NORAD) ដែលជាសម្ព័ន្ធមិត្តរបស់អាមេរិក និងបញ្ជាការយោធាកាណាដា នៅមូលដ្ឋានទ័ពអវកាស Peterson ក្នុងទីក្រុង Colorado Springs ដែលអស់រយៈពេល ៦៩ឆ្នាំ បានផ្តល់នូវរបាយការណ៍ដ៏គួរឲ្យរំភើប ក្នុងការតាមដាននូវសកម្មភាពព្រះបិតាបុណ្យណូអែល។

កាលពីថ្ងៃអង្គារ (ទី២៤ ខែធ្នូ) លោកស្រី Jennie Derenzis អ្នកនាំពាក្យ NORAD បាននិយាយថា៖ «លោកតា សាន់តា ធ្វើឡើងលើស្មារតីនៃពិធីបុណ្យណូអែល ដូច្នេះសកម្មភាពតាមដានរបស់រដ្ឋាភិបាល នឹងមិនប៉ះពាល់ដល់បេសកកម្មរបស់គាត់ឡើយ»។

គួរបញ្ជាក់ថា ទំនៀមទម្លាប់តាមដានសកម្មភាពរបស់លោកតា សាន់តា បានចាប់ផ្តើមនៅឆ្នាំ១៩៥៥ នៅពេលដែលការផ្សាយពាណិជ្ជកម្មលើទំព័រសារព័ត៌មាន នៅទីក្រុង Colorado Springs បានអញ្ជើញក្មេងៗឲ្យទូរសព្ទទៅនិយាយជាមួយលោកតា សាន់តា។

មុននឹងចាប់ផ្តើមការធ្វើដំណើរ ជុំវិញពិភពលោករបស់លោកតា ដើម្បីប្រគល់អំណោយដល់មនុស្សទាំងអស់ លោកតា សាន់តា បានស្វាគមន៍ហ្វូងមនុស្សដែលបានប្រមូលផ្តុំគ្នា នៅក្នុងភូមិសាន់តាក្លូស ក្នុងទីក្រុង Rovaniemi ភាគខាងជើងប្រទេសហ្វាំងឡង់។

អមការដោយជូនពរអ្នកដែលមានវត្តមាន និងអ្នកដែលកំពុងមើលការផ្សាយផ្ទាល់តាមអ៊ិនធរណិត ជាមួយនឹងពាក្យរីករាយថ្ងៃបុណ្យណូអែល លោកតា សាន់តា បានចេញដំណើរនៅក្នុងរទេះរុញដោយសត្វរមាំងរបស់គាត់ ដោយគ្រវីដៃទៅកាន់ហ្វូងមនុស្សនៅពេលគាត់ចេញដំណើរ៕