​អាមេរិក៖ លោក​ប្រធានាធិបតី​អាមេរិក Joe Biden បាន​សុំ​អភ័យទោស​ជា​សាធារណៈ ​ចំពោះ​សន្និសីទ​ស្តីពី​អាកាសធាតុ​របស់​អង្គការ​សហ​ប្រជាជាតិជុំវិញ​ទង្វើ​របស់​លោក Donald Trump ដែល​បាន​ដក​សហរដ្ឋអាមេរិក​ចេញពី​កិច្ចព្រមព្រៀង​ទីក្រុង​ប៉ារីស​។

​ជា​សញ្ញា​ការ​ផ្លាស់ប្ដូរ​ថ្នាក់ដឹកនាំ​អាមេរិកលោក Biden បាន​ទទួល​ស្គាល់​នៅ​ក្នុង​កិច្ចប្រជុំ​កំពូល​ របស់​អង្គការសហប្រជាជាតិ​កាលពី​ថ្ងៃ​ចន្ទថា សហរដ្ឋអាមេរិក និង​ប្រទេស​អភិវឌ្ឍន៍​ផ្សេងទៀត​បាន​ទទួល​រង ​នូវ​ការទទួលខុសត្រូវ​ជាច្រើន​ចំពោះ​ការប្រែប្រួល​អាកាសធាតុ ហើយ​បាន​និយាយ​ថា សកម្មភាព​ដែល​បាន​ធ្វើ​ឡើង​ក្នុង​ទសវត្សរ៍​នេះ ដើម្បី​ទប់ស្កាត់​ការ​ឡើង​កំដៅ​ភព​ផែនដី​នឹង​មាន​ការសម្រេចចិត្ត​ ក្នុង​ការ​ទប់ស្កាត់ជំនាន់​ថ្មី​ពី​ការ​រង​ទុក្ខ​។​ ​ដោយ​ឈរ​នៅ​ចំពោះ​មុខ​មេដឹកនាំ​ពិភពលោក​ ដែល​កំពុង​ប្រមូល​ផ្តុំ​គ្នា​ក្នុង​ដែនដី​ស្កុ​ត​ឡិន លោក Biden បាន​ព្យាយាម​បង្ហាញ​ពី​ការ​ចំណាយ​ដ៏​ធំ​សម្បើម​នៃ​ការកំណត់​ការ​បំភាយ​កាបូន ដែល​ជា​ឱកាស​ដើម្បី​បង្កើត​ការងារ​ដោយ​ការ​ផ្លាស់ប្ដូរ​ទៅជា​ថាមពល​កកើត​ឡើងវិញ និង​រថយន្ត​ដើរ​ដោយ​ថាមពល​អគ្គិសនី​។​

​យ៉ាងណា​ក្ដី លោក​ក៏បាន​សុំ​អភ័យទោស​ផង​ដែរចំពោះ​ការសម្រេចចិត្ត​របស់​អតីត​ប្រធានាធិបតី Donald Trump ក្នុង​ការ​ចាកចេញ​ពី​កិច្ចព្រមព្រៀង​ទីក្រុង​ប៉ារីស និង​តួនាទី​ដែល​សហរដ្ឋអាមេរិក និង​ប្រទេស​អ្នកមាន​ផ្សេងទៀត​បាន​ដើរតួ​ក្នុង​ការ​រួមចំណែក​ដល់​ការប្រែប្រួល​អាកាសធាតុ​។​ ​ចំពោះ​សកម្មភាព​របស់​លោក Trump លោក Biden បាន​និយាយ​ថា "​ខ្ញុំ​មិន​គួរ​សុំទោស​ទេ ប៉ុន្តែ​ខ្ញុំ​សុំទោស​ចំពោះ​ការពិត ​ដែល​សហរដ្ឋអាមេរិកកាលពី​រដ្ឋបាល​ចុងក្រោយ​នោះ បាន​ដក​ខ្លួន​ចេញពី​កិច្ចព្រមព្រៀង​ទីក្រុង​ប៉ារីស ហើយ​ដាក់​ពួក​យើង​ឲ្យ​ស្ថិត​ក្នុង​ស្ថានភាព​លំបាក​បែបនេះ​។​ ​ជា​ញឹកញាប់លោក Biden តែង​រិះគន់​ចំពោះ​វិធីសាស្ត្រ​របស់​រដ្ឋបាល​ចាស់​របស់​លោក ​Trump លើ​បញ្ហអាកាសធាតុ ប៉ុន្តែ​កន្លងមក​ពុំបាន​សុំទោស​ជា​សាធារណៈ​ទៅកាន់​ពិភពលោក​នោះ​ទេ​៕

អត្ថបទ៖ សុខមាន