កូនប្រុស និងទីប្រឹក្សារបស់នាយករដ្ឋមន្ត្រីបង់ក្លាដែស Sheikh Hasina ដែលត្រូវបានទម្លាក់ចេញពីតំណែង កាលពីថ្ងៃអង្គារ (ទី២៤ ខែធ្នូ) បានពណ៌នាការចោទប្រកាន់អំពីអំពើពុករលួយ ពាក់ព័ន្ធនឹងគ្រួសារ ក្នុងឆ្នាំ២០១៥ ថា ជា «ការក្លែងបន្លំទាំងស្រុង» និងជា «យុទ្ធនាការបង្កាច់បង្ខូច» ដោយការចោទនោះ បានសំដៅទៅការផ្តល់កិច្ចសន្យាថាមពលនុយក្លេអ៊ែរតម្លៃ ១២,៦៥ពាន់លានដុល្លារ។

កាលពីថ្ងៃចន្ទ (ទី២៣ ខែធ្នូ) គណៈកម្មាធិការប្រឆាំងអំពើពុករលួយរបស់ប្រទេសបង់ក្លាដែស បាននិយាយថា ខ្លួនបានចាប់ផ្តើមការស៊ើបអង្កេតលើការចោទប្រកាន់ពីបទពុករលួយ ការគៃបន្លំ និងការសម្អាតលុយកខ្វក់ នៅក្នុងគម្រោងរោងចក្រថាមពលនុយក្លេអ៊ែរ Rooppur ដែលគាំទ្រដោយក្រុមហ៊ុនរដ្ឋ Rosatom របស់រុស្ស៊ី។ កិច្ចព្រមព្រៀង សម្រាប់រោងចក្រថាមពលចំនួន ២ ដែលរោងចក្រនីមួយៗ មានកម្លាំងថាមពល ១.២០០មេហ្គាវ៉ាត់ ត្រូវបានចុះហត្ថលេខា ក្នុងឆ្នាំ២០១៥។

គណៈកម្មការនេះ បានចោទប្រកាន់ថា មានភាពមិនប្រក្រតីផ្នែកហិរញ្ញវត្ថុដែលមានតម្លៃប្រហែល ៥ពាន់លានដុល្លារ ពាក់ព័ន្ធនឹងលោកស្រី Hasina កូនប្រុសរបស់លោកស្រី គឺលោក Sajeeb Wazed និងក្មួយស្រីរបស់លោកស្រីឈ្មោះ Tulip Siddiq ដែលជារដ្ឋមន្ត្រីរតនាគារអង់គ្លេស តាមរយៈគណនី នៅឯនាយសមុទ្រ។ ទាំងលោកស្រី Siddiq និងក្រុមហ៊ុន Rosatom មិនបានឆ្លើយតបនឹងសំណើរបស់ទីភ្នាក់ងារសារព័ត៌មាន សម្រាប់ការសុំការអត្ថាធិប្បាយនោះឡើយ។

តែលោក Wazed ដែលនិយាយតំណាងឲ្យគ្រួសារ បានលើកឡើងថា ពួកគេគឺជាគោលដៅនៃការរកលេសថ្កោលទោសខាងនយោបាយ នៅក្នុងប្រទេសបង់ក្លាដែស៕