រដ្ឋមន្រ្តីការបរទេសជប៉ុនលោក Takeshi Iwaya បាននិយាយថា ជប៉ុន និងចិន បានព្រមព្រៀងគ្នាធ្វើការឆ្ពោះទៅរកការដកចេញបំរាមលើការនាំចូលផលិតអាហារសមុទ្រជប៉ុន អំឡុងជំនួបរបស់ពួកគេ នៅក្នុងទីក្រុងប៉េកាំងនាថ្ងៃពុធនេះ ។

លោក Iwaya បាននិយាយប្រាប់ក្រុមអ្នកសារព័ត៌មានថា សមភាគីចិនលោក Wang Yi បានឯកភាពថា ចិន និងជប៉ុន ត្រូវអនុវត្តកិច្ចព្រមព្រៀងដែលបានឈានដល់កាលពីខែកញ្ញា ដែលនឹងបើកផ្លូវឆ្ពោះទៅរកការចាប់ផ្តើមឡើងវិញការដឹកជញ្ជូនអាហារសមុទ្រចេញពីជប៉ុនទៅកាន់ប្រទេសចិន ។

ចំណុចខ្ទាស់សំខាន់នៅក្នុងទំនាក់ទំនងទ្វេភាគីរវាងប្រទេសទាំង ២ គឺការបញ្ចេញទឹកកាកសំណល់ដែលត្រូវបានធ្វើប្រព្រឹត្តកម្ម ពីរោងចក្រនុយក្លេអ៊ែរ Fukushima ។

ទីក្រុងប៉េកាំង បានជំទាស់យ៉ាងខ្លាំង និងថ្កោលទោសការសម្រេចចិត្តរបស់ទីក្រុងតូក្យូ និងបានរឹតបន្តឹងការត្រួតពិនិត្យលើទំនិញជប៉ុន ដើម្បីជាការឆ្លើយតប ។

លោក Iwaya បាននិយាយផងដែរថា លោកបានលើកឡើងពីក្តីកង្វល់របស់ជប៉ុនចំពោះសកម្មភាពយោធាចិននៅក្នុងសមុទ្រចិនខាងកើត ៕