អ្នកនាំពាក្យរបស់កងកម្លាំងប្រដាប់អាវុធហ៊ួទី លោក Yahya Sare'e បាននិយាយថា ក្រុមហ៊ួទីនៃចលនាឧទ្ទាម Ansar Allah បានវាយប្រហារលើគោលដៅយោធា ដែលមានទីតាំងនៅជិតទីក្រុង Tel Aviv ដោយមីស៊ីលល្បឿនលឿនជាងសំឡេង។

លោក Sare'e បានប្រាប់ទូរទស្សន៍ Al Masirah TV ថា៖«កងទ័ពមីស៊ីលរបស់កងកម្លាំងប្រដាប់អាវុធយេម៉ែន បានវាយប្រហារដោយមីស៊ីលបាលីស្ទីកល្បឿនលឿន Palestine-2 ទៅលើមូលដ្ឋានយោធារបស់អ៊ីស្រាអែល ក្នុងតំបន់ Jaffaដែលគ្រប់គ្រងដោយអ៊ីស្រាអែល។ យោងតាមអ្នកនាំពាក្យរូបនេះបានឲ្យដឹងថា ប្រតិបត្តិការឧទ្ទាមប្រឆាំងនឹងអ៊ីស្រាអែល «បានសម្រេចគោលដៅរបស់ខ្លួនដោយជោគជ័យ»។

កាលពីយប់ថ្ងៃពុធ ការិយាល័យសារព័ត៌មានរបស់កងទ័ពអ៊ីស្រាអែល បានរាយការណ៍ថា ស៊ីរ៉ែនវាយប្រហារតាមអាកាស បានបន្លឺឡើងនៅក្នុងតំបន់ជាច្រើននៃភាគកណ្តាលអ៊ីស្រាអែល បន្ទាប់ពីការបាញ់មីស៊ីលពីប្រទេសយេម៉ែន។ យោធាបានស្ទាក់ចាប់មីស៊ីលដោយជោគជ័យ មុនពេលវាចូលទៅក្នុងដែនអាកាសអ៊ីស្រាអែល។

បន្ទាប់ពីការកើនឡើងនៃជម្លោះប៉ាឡេស្ទីន-អ៊ីស្រាអែល នៅតំបន់ហ្កាហ្សាស្ទ្រីប ក្រុមហ៊ួទី បានព្រមានថាពួកគេនឹងបើកការវាយប្រហារលើទឹកដីអ៊ីស្រាអែល ខណៈពេលដែលរារាំងនាវាដែលមានទំនាក់ទំនង ជាមួយរដ្ឋជ្វីហ្វ មិនឲ្យឆ្លងកាត់សមុទ្រក្រហម និងច្រកសមុទ្រ Bab el-Mandeb រហូតដល់ ទីក្រុង Tel Aviv បានបញ្ឈប់ប្រតិបត្តិការយោធារបស់ខ្លួនប្រឆាំងនឹងក្រុមសកម្មប្រយុទ្ធប៉ាឡេស្ទីនហាម៉ាស នៅក្នុងដែនដីដែលកំពុងមានការប្រយុទ្ធគ្នានេះ។ ចាប់តាំងពីពាក់កណ្តាលខែវិច្ឆិកាមក នាវាស៊ីវិលរាប់សិបគ្រឿងត្រូវបានវាយប្រហារដោយក្រុមហ៊ួទី នៅក្នុងសមុទ្រក្រហម និងឈូងសមុទ្រ Aden។