មនុស្សរាប់រយនាក់ដែលស្លៀកពាក់ជាលោកតាសាន់តាក្លូស បានជួបជុំគ្នានៅតំបន់ឆ្នេរ Cocoa រដ្ឋ Florida សហរដ្ឋអាមេរិកកាលពីថ្ងៃអង្គារ សម្រាប់ព្រឹត្តការណ៍ជិះរលកសមុទ្រសាន់តាក្លូសប្រចាំឆ្នាំលើកទី ១៦ ។

ព្រឹត្តការណ៍សប្បុរសធម៌នេះ នាំមកនូវការជិះរលកសមុទ្រ និងអ្នករៀបចំពិធីបុណ្យណូអែលក្រោមកម្តៅថ្ងៃនៅរដ្ឋ Florida ជាមួយនឹងស្មារតីថ្ងៃឈប់សម្រាក ។

ដោយចាប់ផ្តើមដំបូងជាមួយការរៀបចំទ្រង់ទ្រាយតូច ឥឡូវវាបានប្រែក្លាយជាប្រពៃណីទ្រង់ទ្រាយធំដ៏សប្បាយរីករាយ សម្រាប់អ្នកស្រុក និងភ្ញៀវទេសចរ ។

ព្រឹត្តការណ៍នៅឆ្នាំនេះ បានទាក់ទាញភ្ញៀវជិត ១៣.០០០នាក់ មកពីទូទាំងពិភពលោក ដោយមានការផ្សាយផ្ទាល់លើបណ្តាញព័ត៌មានសង្គម Facebook និងរៃអង្គាសបានប្រាក់ចំនួន ១០ម៉ឺនដុល្លារសម្រាប់ក្រុមសប្បុរសធម៌ចំនួន ២ គឺក្រុម Grind for Life និងក្រុម Florida Surf Museum ។

ចាប់តាំងពីការចាប់ផ្តើមដំបូងកាលពីឆ្នាំ ២០០៩ ព្រឹត្តការណ៍សាន់តាក្លូសជិះរលកសមុទ្រ រៃអង្គាសបានប្រាក់ជិត ៤០ម៉ឺនដុល្លារ ។

នៅក្នុងឆ្នាំនេះ ព្រឹត្តការណ៍សាន់តាក្លូសជិះរលកសមុទ្រ បានចាប់ដៃគូជាមួយអង្គការមិនរកប្រាក់ចំណេញជាតិ WhoWePlayFor ដែលធ្វើការដើម្បីការពារការស្លាប់ភ្លាមៗដោយសារជំងឺបេះដូងលើមនុស្សវ័យក្មេង គឺជាករណីស្លាប់ឈានមុខគេនៅក្នុងចំណោមយុវជន និងក្រុមជិះរលកសមុទ្រនៅសហរដ្ឋអាមេរិក ។

ជាមួយនឹងការប្រគុំតន្រ្តី និងការប្រកួតសម្លៀកបំពាក់ អ្នកចូលរួមព្រឹត្តការណ៍សាន់តាក្លូសជិះរលកសមុទ្រ មានឱកាសទទួលបានការពិនិត្យអេឡិចត្រូតបេះដូងដោយឥតគិតថ្លៃ ដែលវាឆ្លុះបញ្ចាំងពីការផ្តោតសំខាន់កើនឡើងរបស់ព្រឹត្តការណ៍លើបញ្ហាសុខភាព និងសុវត្ថិភាពសហគមន៍ ៕