ក្រសួងការពារជាតិ នៅថ្ងៃពុធ (ទី២៥ ខែធ្នូ) នេះ បានប្រាប់ឲ្យដឹងថា យោធាទួរគី បានសម្លាប់ពួកសកម្មប្រយុទ្ធឃឺដចំនួន ២១នាក់ នៅភាគខាងជើងប្រទេសស៊ីរី និងអ៊ីរ៉ាក់។

នៅក្នុងសេចក្តីថ្លែងការណ៍ ក្រសួងបានរាយការណ៍ថា សមាជិករបស់គណបក្សពលករឃឺដ (PKK) និងក្រុមសកម្មប្រយុទ្ធឃឺដស៊ីរី YPG ចំនួន ២០នាក់ ដែលកំពុងរៀបចំការវាយប្រហារ ត្រូវបានសម្លាប់ នៅភាគខាងជើងប្រទេសស៊ីរី ខណៈដែលសកម្មប្រយុទ្ធម្នាក់ទៀត ត្រូវបានសម្លាប់នៅភាគខាងជើងប្រទេសអ៊ីរ៉ាក់។ ក្រសួងបានបន្ថែមថា៖ «ប្រតិបត្តិការរបស់យើង នឹងបន្តធ្វើប្រកបដោយប្រសិទ្ធភាព និងដាច់ណាត់»។

គួរបញ្ជាក់ថា PKK ដែលត្រូវបានកំណត់ថា ជាអង្គការភេរវករដោយប្រទេសទួរគី សហភាពអឺរ៉ុប និងសហរដ្ឋអាមេរិកនោះ បានចាប់ផ្តើមការបះបោរប្រដាប់អាវុធប្រឆាំងនឹងរដ្ឋទួរគី ក្នុងឆ្នាំ១៩៨៤។ ជម្លោះនេះបានឆក់យកជីវិតមនុស្សជាង ៤០.០០០នាក់។

ហើយទួរគីចាត់ទុកក្រុម YPG ដែលជាកម្លាំងឈានមុខគេនៅក្នុងកងកម្លាំងប្រជាធិបតេយ្យស៊ីរី (SDF) គាំទ្រដោយសហរដ្ឋអាមេរិកថា ជាអង្គភាពមានសម្ព័ន្ធដ៏ជិតស្និទ្ធជាមួយ PKK ហើយចាត់ទុកជាក្រុមភេរវករដូចគ្នា។ 

បន្ទាប់ពីការដួលរលំរបបរបស់ប្រធានាធិបតីស៊ីរី លោក Bashar al-Assad នៅដើមខែនេះ ទីក្រុងអង់ការ៉ាបានលើកឡើងម្តងហើយម្តងទៀតថា ក្រុម YPG ត្រូវតែរំលាយ ដោយអះអាងថា ក្រុមនេះមិនត្រូវមានមុខនៅក្នុងអនាគតរបស់ប្រទេសស៊ីរីជាដាច់ខាត។

ប្រតិបត្តិការ នៅថ្ងៃពុធនេះ កើតឡើងក្នុងពេលដែលអរិភាពបន្តមាននៅភាគឦសានប្រទេសស៊ីរី រវាងក្រុមស៊ីរីដែលគាំទ្រដោយទួរគី និងក្រុម YPG៕