ក្រុមប្រដាប់អាវុធ បានសម្លាប់មនុស្សយ៉ាងហោច ៣នាក់ ក្រោយពេលពួកគេបើកការបាញ់ប្រហារដោយឥតញញើតដៃលើក្រុមអ្នកសារព័ត៌មានដែលកំពុងរាយការណ៍ពិធីបើកសម្ពោធន៍ដាក់ឲ្យប្រើប្រាស់ឡើងវិញមន្ទីរពេទ្យរដ្ឋធំបំផុតរបស់ប្រទេសហៃទី ។

អ្នកសារព័ត៌មានម្នាក់នៅកន្លែងកើតហេតុ បាននិយាយថា អ្នកធ្វើសេចក្តីរាយការណ៍ ២នាក់ និងមន្រ្តីនគរបាលម្នាក់ ត្រូវបានសម្លាប់ ។

ក្រុមអ្នកសារព័ត៌មានដែលទទួលបានការអញ្ជើញ បានមកដល់មន្ទីរពេទ្យស្ថិតក្នុងទីក្រុង Port-au-Prince នៅវេលាម៉ោង ៨ព្រឹក ម៉ោងក្នុងស្រុក ថ្ងៃអង្គារ សម្រាប់ការធ្វើសន្និសីទសារព័ត៌មានរបស់រដ្ឋាភិបាលជាមួយរដ្ឋមន្រ្តីសុខាភិបាលថ្មីរបស់ប្រទេសហៃទី ។

រយៈពេល ៣ម៉ោងក្រោយមក ពេលដែលពួកគេកំពុងរង់ចាំរដ្ឋមន្រ្តីសុខាភិបាល ការបាញ់ប្រហារក៏បានចាប់ផ្តើមឡើង ។

រូបភាពវីដេអូឃ្លីបសាក្សី ឃើញក្រុមអ្នកសារព័ត៌មានបានឈូរឆរនៅលើកម្រាលឥដ្ឋ ដោយពួកគេមួយចំនួន រងការបាញ់ប្រហារ ខណៈដែលមនុស្សដទៃទៀត បានរត់គេចចេញពីមន្ទីរពេទ្យតាមជញ្ជាំង ។

សូមបញ្ជាក់ថា មន្ទីរពេទ្យសាកលវិទ្យាលរដ្ឋហៃទី បានបិទដំណើរការ ចាប់តាំងពីការកញ្ជ្រោលឡើងការវាយប្រហាររបស់ជនអន្ធពាលកាលពីខែមីនាកន្លងទៅ ដែលគេមើលឃើញអតីតនាយករដ្ឋមន្រ្តីប្រទេសមួយនេះ ត្រូវបានទម្លាក់ចេញពីអំណាច ។

ក្រុមអន្ធពាលប្រដាប់អាវុធបច្ចុប្បន្នបានគ្រប់គ្រងស្ទើតែទាំងស្រុងទីក្រុង Port-au-Prince និងតំបន់ជាច្រើនផ្សេងទៀតនៅក្នុងប្រទេសហៃទី ។

ពួកគេតែងតែមានគោលដៅលើមន្ទីរពេទ្យ និងបង្ខំឲ្យមន្ទីរពេទ្យភាគច្រើនបិទទ្វារ ជាការបង្ហាញកម្លាំងដាក់សំពាធលើរដ្ឋាភិបាល ៕