រដ្ឋមន្ត្រីក្រសួងហិរញ្ញវត្ថុរុស្ស៊ី លោក Anton Siluanov នៅថ្ងៃពុធ (ទី២៥ ខែធ្នូ) នេះ បាននិយាយថា បណ្ដាក្រុមហ៊ុនរុស្ស៊ី បានចាប់ផ្តើមប្រើប្រាស់ប៊ីតខន និងរូបិយប័ណ្ណឌីជីថលផ្សេងទៀត នៅក្នុងការទូទាត់អន្តរជាតិ បន្ទាប់ពីមានការកែប្រែច្បាប់ដែលអនុញ្ញាតឲ្យមានប្រើប្រាស់បែបនេះ ដើម្បីទប់ទល់នឹងការដាក់ទណ្ឌកម្មរបស់លោកខាងលិច។

ការដាក់ទណ្ឌកម្មបានធ្វើឲ្យមានភាពស្មុគស្មាញដល់ពាណិជ្ជកម្មរបស់រុស្ស៊ីជាមួយដៃគូធំៗ ដូចជាចិន ឬទួរគី ដោយសារធនាគារក្នុងស្រុក មានការប្រុងប្រយ័ត្នខ្លាំង ជាមួយប្រតិបត្តិការដែលទាក់ទងនឹងប្រទេសរុស្ស៊ី ដើម្បីជៀសវាងការត្រួតពិនិត្យពីនិយតករលោកខាងលិច។

នៅឆ្នាំនេះ រុស្ស៊ីបានអនុញ្ញាតឲ្យប្រើប្រាស់រូបិយប័ណ្ណគ្រីបតូ ក្នុងពាណិជ្ជកម្មបរទេស ហើយបានចាត់វិធានការ ដើម្បីធ្វើឲ្យស្របច្បាប់ ក្នុងដំណើរការរូបិយប័ណ្ណគ្រីបតូផ្សេងទៀត ក្នុងនោះរួមទាំងប៊ីតខនផងដែរ។

កាលពីដើមខែនេះ ប្រធានាធិបតី Vladimir Putin បាននិយាយថា រដ្ឋបាលអាមេរិក បច្ចុប្បន្ន កំពុងធ្វើឲ្យខូចតួនាទីរបស់ប្រាក់ដុល្លារអាមេរិក ក្នុងនាមជារូបិយប័ណ្ណបម្រុង ដោយប្រើប្រាស់វា សម្រាប់គោលបំណងនយោបាយ ដោយបង្ខំឲ្យប្រទេសជាច្រើនងាកទៅរកទ្រព្យសម្បត្តិផ្សេងជំនួសវិញ៕