ស្វាយរៀង ÷ លោកហែមសារិទ្ធអភិបាលស្រុកស្វាយជ្រុំខេត្តស្វាយរៀងនៅថ្ងៃទី២៦ ខែធ្នូឆ្នាំ២០២៤ នេះបានអញ្ជើញបើកវគ្គបំពាក់បំប៉នគ្រូកិច្ចសន្យាសម្រាប់ឆ្នាំ២០២៥ ដែលពិធីនេះបានប្រព្រឹត្តទៅនៅវិទ្យាល័យហ៊ុនសែន ស្វាយជ្រំ

ដោយមានការអញ្ជើញចូលរួមពី លោកនាយក នាយករង លោកគ្រូ អ្នកគ្រូនៅតាមវិទ្យាល័យ សាលាបឋមសិក្សា ក្នុងស្រុកនិងលោកគ្រូ អ្នកគ្រូកិច្ចសន្យាចំនួន២៥៧នាក់។

 មានប្រសាសន៍បើកវគ្គបំប៉ននាឱកាសនោះក្នុងនាមរដ្ឋបាលខេត្តនិងស្រុកស្វាយជ្រំ លោកហែម សារិទ្ធ បានសម្ដែងអបអរសាទរចំពោះការិយាល័យអប់រំយុវជននិងកីឡាស្រុក ដែលកន្លងមកបានរួមអនុវត្តគោលនយោបាយបណ្ដុះបណ្ដាលធនធានមនុស្សបានល្អរហូតសិស្សទទួលបាននិទ្ទេសល្អប្រសើរនៅក្នុងសម័យប្រឡងមធ្យមសិក្សាទុតិយភូមិឆ្នាំសិក្សា២០២៣.៣០២៤។

 ទាក់ទងទៅនឹងពិធីបើកវគ្គបំពាក់បំប៉នគ្រូកិច្ចសន្យានៅថ្ងៃនេះលោកអភិបាលស្រុកបានស្នើដល់លោកគ្រូអ្នកគ្រូដែលទទួលការបំប៉ននៅថ្ងៃនេះ ត្រូវគោរពពេលវេលាសិក្សារៀនសូត្រនិងស្វែងយល់ឲ្យបានស៊ីជម្រៅរាល់ខ្លឹមសារមេរៀន ដែលក្រុមគ្រូបានឧទ្ទនាមជូន ក្នុងករណីមេរៀនដែលមិនយល់ត្រូវស្នើដល់គ្រូឧទ្ទេសធ្វើការបកស្រាយ ដើម្បីទទួលយកចំណេះដឹងទាំងនេះទៅអនុវត្តបង្រៀនសិស្សឲ្យបានចំទិសដៅ។

  សូមបញ្ជាក់ថាគ្រូកិច្ចសន្យាដែលរដ្ឋបាលស្រុកបើកវគ្គបំពាក់បំប៉ននៅថ្ងៃនេះជាគ្រូបង្រៀនសាលាបឋមសិក្សាចាប់ពីថ្នាក់ទ១ដល់ថ្នាក់ទី៦នៅទូទាំងស្រុក បន្ទាប់ពីគណៈកម្មការជ្រើសរើសឱ្យចូលបង្រៀនសិស្សសម្រាប់ឆ្នាំ ២០២៥ ខាងមុខ។ ដោយ ÷ ភា សារឹត