កំពង់ឆ្នាំង៖ ប្រជានុរាស្ត្រជាច្រើនគ្រួសារនៅក្នុងស្រុកបរិបូណ៌ ខេត្តកំពង់ឆ្នាំង ដែល​ជួប​ការ​លំបាក​ក្នុង​ការ​ប្រើប្រាស់ទឹកស្អាតប្រចាំថ្ងៃ បានសប្បាយចិត្ត និងថ្លែងអំណរព្រះរាជគុណដ៏​ជ្រាល​ជ្រៅ​ជា​ទី​​បំផុត ចំពោះព្រះមហាក្សត្រនៃកម្ពុជា ដែលបានព្រះរាជទាន ព្រះរាជសមិទ្ធផល ដ៏ឧត្តុង្គ​ឧត្តម​ជា​អណ្តូង​ទឹក​ស្អាតចំនួន ៣២អណ្តូង ដល់ប្រជានុរាស្ត្រក្នុងស្រុកបរិបូណ៌ ខេត្តកំពង់ឆ្នាំង។

ប្រជានុរាស្ត្រជាច្រើនគ្រួសារនៅក្នុងស្រុកបរិបូណ៌ ខេត្តកំពង់ឆ្នាំង បានថ្លែងនូវ​អំណរ​ព្រះរាជ​គុណ​ដ៏​ជ្រាល​ជ្រៅជា​ទីបំផុត ចំពោះព្រះរាជទាន ព្រះរាជសមិទ្ធផល ដ៏ឧត្តុង្គឧត្តមខាងលើនេះ។ ការ​ប្រោស​​ព្រះរា​ជ​ទានអណ្តូងទឹកស្អាតដោយប្រើម៉ូទ័រ ជាព្រះរាជអំណោយដ៏ថ្លៃថ្លារបស់ព្រះករុណា ជា​អម្ចាស់ជីវិតលើត្បូងជាទីសក្ការៈដ៏ខ្ពង់ខ្ពស់បំផុត នៅក្នុង​មូលដ្ឋាន​នេះ​បាន​ធ្វើ​ឲ្យ​បង​ប្អូន​ប្រជា​រាស្រ្ត ​មានសេចក្តីសប្បាយត្រេកអរជាពន់ពេក ព្រោះថានៅក្នុង​មូលដ្ឋាន​នេះ​កន្លង​មក​ខ្វះប្រភព​ទឹក​សម្រាប់​ប្រើប្រាស់។ ការប្រោសព្រះរាជទានព្រះរាជអំណាយដ៏ថ្លៃថ្លាជាអណ្តូងទឹកស្អាតទាំង៣២កន្លែងនេះ បា​ន​ធ្វើ​ឲ្យ​បង​ប្អូន​ប្រជារាស្រ្តនៅក្នុងមូលដ្ឋាន មានលក្ខណៈងាយស្រួល ដោយចំណេញ​ពេល​វេលា​ក្នុង​ដឹក​ជញ្ជូន​យក​ទឹកពីទីធ្ងាយ ជាពិសេសទៅទៀតការទទួលបានព្រះរាជអំណាយ ជាអណ្តូងទឹក​ដ៏​វិសេស​វិសាលនេះ បានធ្វើឲ្យបងប្អូនមានទឹកគ្រប់គ្រាន់សម្រាប់ទទួលទានប្រកបដោយសុខភាព ការ​ប្រើប្រាស់បម្រើការងារផ្សេងៗក្នុងជីវភាពប្រចាំថ្ងៃ និងធ្វើឲ្យបង​ប្អូន​មាន​លទ្ធភាព​ស្រោច​ស្រព​ភោគ​ផល​ដំណាំគ្រប់ប្រភេទ បានយ៉ាងងាយស្រួលទៀតផង។

យោងតាមព្រះរាជតម្រិះដ៏ខ្ពង់ខ្ពស់របស់ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃ​ព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត សម្តេចមហាមន្ត្រី គុយ សុផល ឧប​នាយករដ្ឋមន្រ្តី រដ្ឋមន្ត្រីក្រសួងព្រះបរមរាជវាំង ជាព្រះរាជតំណាងដ៏ខ្ពង់ខ្ពស់របស់ព្រះករុណា ព្រះម​ហាក្សត្រ បានអញ្ជើញពិនិត្យសកម្មភាពការងារ របស់មន្ត្រី បុគ្គលិក នៃក្រុមការងារសម្តេចឪ ដែល​កំពុងធ្វើសកម្មភាពយ៉ាងសកម្មមមាញឹកបំផុត លើការកសាង​ព្រះរាជ​សមិទ្ធ​ផល​ជា​អណ្តូង​ទឹក ដែលជាព្រះរាជអំណោយដ៏ថ្លៃថ្លារបស់ ព្រះករុណា ព្រះមហាក្សត្រ ព្រះអង្គ សព្វព្រះ​រាជ​ហឬ​ទ័យ ប្រោសព្រះរាជទានជូនប្រជារាស្រ្តជា បងប្អូនកូនចៅ របស់ព្រះអង្គ រស់នៅក្នុងស្រុកបរិបូណ៌ ខេត្ត​កំពង់ឆ្នាំងនាពេលនេះ៕ កាំង ហុងវាស្នា