របាយការណ៍ចុងក្រោយរបស់អង្គការទេសន្តរប្រវេសន៍អន្តរជាតិ (IOM) ដែលចេញផ្សាយកាលពីថ្ងៃអង្គារ (២៤ ធ្នូ) បានឱ្យដឹងថា ចំនួនអ្នកភៀសខ្លួនក្នុងស្រុកសរុបនៃជនជាតិស៊ូដង់ ឡើងលើសពី ១១,៥៣លាននាក់ ដោយមានប្រហែល ៨,៧៩លាននាក់ បានភៀសខ្លួនចាប់តាំងពីការផ្ទុះឡើងនៃជម្លោះប្រដាប់អាវុធនៅថ្ងៃទី១៥ ខែមេសា ឆ្នាំ២០២៣ មក។

របាយការណ៍និយាយថា ភាគច្រើននៃជនភៀសខ្លួនគឺមកពីរដ្ឋធានី ខាទុម (Khartoum) និងតំបន់ដាហ្វឺ (Darfur) នៅភាគខាងលិច ហើយជនភៀសខ្លួនស៊ូដង់ទាំងនោះ រស់នៅរាយប៉ាយនៅក្នុងរដ្ឋចំនួន ១៨ នៅទូទាំងប្រទេស ហើយ ៥២% នៃពួកគេគឺជាអនីតិជន។

របាយការណ៍ក៏និយាយផងដែរថា ជម្លោះប្រដាប់អាវុធនៅស៊ូដង់ បានបណ្តាលឱ្យជនជាតិស៊ូដង់ប្រហែល ៣,៣៥លាននាក់ ភៀសខ្លួនទៅប្រទេសជិតខាង។

ទីភ្នាក់ងារជនភៀសខ្លួនអង្គការសហប្រជាជាតិ (UNHCR) លើកឡើងថា ក្នុងរយៈពេលតិចជាងបីសប្តាហ៍ មនុស្សជាង ៨០.០០០នាក់ បានស្វែងរកទីសុវត្ថិភាពនៅប្រទេសស៊ូដង់ខាងត្បូង បន្ទាប់ពីកំណើនការប្រយុទ្ធនៅក្នុងរដ្ឋ វ៉ាយ នីល (White Nile), សិនណា (Sennar) និង ប្លូ នីល (Blue Nile) របស់ប្រទេសស៊ូដង់ ហើយភាគច្រើនជាស្ត្រី និងកុមារ មានតម្រូវការមនុស្សធម៌ខ្លាំង។

ជម្លោះប្រដាប់អាវុធរវាងកងកម្លាំងប្រដាប់អាវុធស៊ូដង់ (SAF) និងគូប្រជែងកងកម្លាំងគាំទ្ររហ័សយោធាប៉ារ៉ា (RSF) បានរីករាលដាលដល់ផ្នែកផ្សេងទៀតនៃប្រទេស ចាប់តាំងពីបានផ្ទុះឡើងនៅក្នុងរដ្ឋធានីកាលពីឆ្នាំមុនមក ដែលនាំឱ្យមនុស្សប្រហែល ២៨.៧០០នាក់បានស្លាប់៕