​អង់គ្លេស៖ ក្រុម​សកម្មជន​បាន​ជួបជុំគ្នា​នៅ​ខាងក្រៅ​សារមន្ទីរ Kelvingrove ក្នុង​ទីក្រុង Glasgow នៃ​ដែនដី​ស្កុ​ត​ឡិន​របស់​អង់គ្លេស​កាលពី​ល្ងាច​ថ្ងៃ​ចន្ទ ជា​កន្លែង​ដែល​មេដឹកនាំ​ពិភពលោក​កំពុង​ចូលរួម​ពិធី​ទទួល​ស្វាគមន៍​ ជាមួយ​សមាជិក​នៃ​រាជវង្ស​អង់គ្លេស​។​

​ដោយ​កាន់​បដា​ដែល​សរសេរ​ថា "​យើង​កំពុង​មើល​អ្នក​" និង "​មិន​មាន​ភព B" ទេ សកម្មជន​ទំនងជា​ព្យាយាម​ដាក់​សម្ពាធ​ដើម្បី​ទទួល​បាន​ការសន្យា​ដ៏​មុតមាំ​ សម្រាប់​សកម្មភាព​បម្រែបម្រួល​អាកាស​ធាតុ​។​ មេដឹកនាំ និង​រាជវង្ស​ត្រូវ​បាន​ប្រមូល​ផ្តុំ​គ្នា​នៅ​ទីក្រុង Glasgow សម្រាប់​កិច្ចប្រជុំ​កំពូល​ស្តីពី​អាកាសធាតុ​របស់​អង្គការសហប្រជាជាតិ ដែល​ដំណើរការ​រយៈពេល​ពីរ​សប្ដាហ៍​បន្ទាប់ ពោល​គឺចាប់ពី​ថ្ងៃអាទិត្យ ទី៣១ ខែ​តុលា ឆ្នាំ២០២១ រហូតដល់​ថ្ងៃ​សុក្រ​ ទី១២ ខែ​វិច្ឆិកា ឆ្នាំ​២០២១​។ សន្និសីទ​នេះ​មាន​គោលបំណង​ដើម្បី​ឱ្យ​រដ្ឋាភិបាល​នានា​ ប្ដេជ្ញា​ទប់ស្កាត់​ការ​បំភាយ​កាបូន​ឱ្យ​បាន​លឿន​គ្រប់​គ្រាន់​ ដើម្បី​ទប់​ការ​ឡើង​កំដៅ​ផែនដី​ដល់ ១.៥​អង្សា​សេ ឬ​ស្មើ (២.៧​អង្សា​ហ្វា​រិ​ន​ហៃ​) លើស​ពី​កម្រិត​មុន​ការ​ធ្វើ​ឧស្សាហកម្ម​។​

​ចំណែក​ក្រុម​អ្នកធ្វើ​យុទ្ធនាការ​របស់​អង្គការ​អន្តរជាតិ Oxfam បាន​រៀបចំ​ការ​តវ៉ា​មួយ​ដោយ​ការ​ពាក់​មុខជា​រូបតំណាង​មេដឹកនាំ​ពិភពលោក​ កំពុង​លេង​នៅ​ក្នុង​ក្រុម​តន្ត្រី​បែប​ប្រពៃណី​របស់​ស្កុ​ត​ឡិន ​នៅ​ជិត​កិច្ចប្រជុំ​កំពូល​ស្ដីពី​បម្រែបម្រួល​អាកាសធាតុ​របស់​អង្គការសហប្រជាជាតិ​លើក​ទី​២៦ ឬ ហៅ​កាត់​ថា COP26 ក្នុង​ទីក្រុង Glasgow កាលពី​ថ្ងៃ​ចន្ទ​។​ រូប​ថ្លុក​របស់​មេដឹកនាំ រួម​ទាំង​អធិការបតី​អាល្លឺម៉ង់​លោកស្រី Angela Merkel, ប្រធានាធិបតី​សហរដ្ឋអាមេរិក​លោក Joe Biden និង​នាយក​រដ្ឋមន្ត្រី​អង់គ្លេស​លោក​ Boris Johnson បាន​ស្លៀកពាក់​ជា​ក្រុម​តន្ត្រី​វាយ​ស្គរ និង​ឧបករណ៍​ផ្លុំ​៕

អត្ថបទ៖ សុខមាន