រដ្ឋមន្ត្រីការពារជាតិអ៊ីស្រាអែល Israel Katz បាននិយាយកាលពីថ្ងៃពុធថា កងកម្លាំងអ៊ីស្រាអែល នឹងនៅតែស្ថិតនៅក្នុងតំបន់ហ្កាហ្សា និងរក្សា «ការគ្រប់គ្រងសន្តិសុខ» លើទឹកដីប៉ាឡេស្ទីន ដោយបង្កើនការព្រួយបារម្ភថា កិច្ចចរចាបទឈប់បាញ់ចុងក្រោយ អាចប្រឈមនឹងការជាប់គាំងបន្ថែមទៀត។

ក្នុងអំឡុងពេលទស្សនកិច្ចទៅកាន់តំបន់ទ្រនាប់មួយ នៅតាមបណ្តោយព្រំដែនហ្កាហ្សា-អេហ្ស៊ីប លោក Katz បានលើកឡើងថា៖«ការគ្រប់គ្រងសន្តិសុខ នៅក្នុងតំបន់ហ្កាហ្សា នឹងនៅតែស្ថិតក្នុងដៃរបស់ IDF (កងកម្លាំងការពារអ៊ីស្រាអែល)»។

លោកបានបញ្ជាក់ថា កងកម្លាំងអ៊ីស្រាអែល នឹងបន្តនៅក្នុង «តំបន់សន្តិសុខ តំបន់ទ្រនាប់ និងទីតាំងគ្រប់គ្រង» នៅក្នុងតំបន់ហ្កាហ្សាស្ទ្រីប ដោយពណ៌នាអំពីវិធានការនេះថា ចាំបាច់«ដើម្បីធានាសុវត្ថិភាពរបស់សហគមន៍ (អ៊ីស្រាអែល)»។

លោក Katz បានបន្ថែមថា៖«នឹងមិនមានរដ្ឋាភិបាលហាម៉ាស នៅទីនេះ ហើយយោធាហាម៉ាសក៏គ្មានដែរ ការពិតថ្មីនឹងលេចឡើង ដោយសារការប្រយុទ្ធដែលកំពុងបន្ត»។

ការអត្ថាធិប្បាយរបស់លោករដ្ឋមន្ត្រី បានធ្វើឡើងភ្លាមៗ បន្ទាប់ពីការិយាល័យរបស់នាយករដ្ឋមន្ត្រីអ៊ីស្រា  អែលលោក បេនចាមីន ណេតាន់យ៉ាហ៊ូ ( Benjamin Netanyahu) និងក្រុមហាម៉ាស បានចោទប្រកាន់គ្នាទៅវិញទៅមក ជុំវិញការពន្យារពេលក្នុងការឈានដល់កិច្ចព្រមព្រៀងបទឈប់បាញ់ នៅតំបន់ហ្កាហ្សា ដោយភាគីនីមួយៗអះអាងថា ភាគីម្ខាងទៀត បានបង្ហាញការទាមទារថ្មី។ ការទាមទារដ៏សំខាន់មួយដោយក្រុមហាម៉ាស គឺការដកកងទ័ពអ៊ីស្រាអែលចេញពីដែនដី ដែលត្រូវបានបំផ្លិចបំផ្លាញដោយការទម្លាក់គ្រាប់បែក និងការវាយប្រហារតាមអាកាសយ៉ាងធ្ងន់ធ្ងររបស់អ៊ីស្រាអែល។