កូរ៉េខាងត្បូង បាននិយាយនៅថ្ងៃព្រហស្បតិ៍នេះថា ខ្លួននឹងដាក់ទណ្ឌកម្មឯករាជ្យលើបុគ្គលិកផ្នែកព័ត៌មានវិទ្យា ( IT) របស់កូរ៉េខាងជើងចំនួន ១៥នាក់ និងអង្គភាពមួយ ជុំវិញតួនាទីរបស់ពួកគេ នៅក្នុងសកម្មភាពតាមអ៊ីនធឺណិតខុសច្បាប់ ដើម្បីផ្តល់មូលនិធិដល់ការអភិវឌ្ឍនុយក្លេអ៊ែរ និងមីស៊ីលរបស់ប្រទេសនេះ។

ក្រសួងការបរទេសក្រុងសេអ៊ូល បានឲ្យដឹងថា បុគ្គលចំនួន ១៤នាក់ក្នុងចំណោម ១៥នាក់ រួមមានលោក Pak Hung-ryong, លោក Yun Jong-sik និង លោក Ri Il-jin ត្រូវបានគេសង្ស័យថា បានធ្វើការនៅក្រៅប្រទេស ដើម្បីរកប្រាក់បរទេសតាមរយៈសកម្មភាពតាមអ៊ីនធឺណិតខុសច្បាប់ ដូចជាការលួចរូបិយប័ណ្ណឌីជីថល Crypto ដើម្បីផ្តល់មូលនិធិដល់ការអភិវឌ្ឍនុយក្លេអ៊ែរ និងមីស៊ីលរបស់កូរ៉េខាងជើង ដែលត្រូវបានហាមឃាត់ នៅក្រោមសេចក្តីសម្រេចជាច្រើនរបស់ក្រុមប្រឹក្សាសន្តិសុខអង្គការសហប្រជាជាតិ។

ពួកគេទាំងអស់គ្នា គឺជាបុគ្គលិករបស់ការិយាល័យទូទៅលេខ ៣១៣ នៃនាយកដ្ឋានឧស្សាហកម្មអាវុធរបស់កូរ៉េខាងជើងទទួលបន្ទុកការផលិតអាវុធ និងការស្រាវជ្រាវ និងការអភិវឌ្ឍពាក់ព័ន្ធ។ នាយកដ្ឋាននេះ ក៏ស្ថិតនៅក្រោមការដាក់ទណ្ឌកម្មរបស់អង្គការសហប្រជាជាតិផងដែរ។

ការិយាល័យទូទៅលេខ ៣១៣ ត្រូវបានគេចោទប្រកាន់ថា មានការជាប់ពាក់ព័ន្ធក្នុងការបញ្ជូនអ្នកជំនាញផ្នែកព័ត៌មានវិទ្យារបស់កូរ៉េខាងជើង ទៅកាន់ប្រទេសចិន រុស្សី និងបណ្តាប្រទេស ក្នុងតំបន់អាស៊ីអាគ្នេយ៍ និងអាហ្រ្វិក ដើម្បីផ្តល់មូលនិធិដល់កម្មវិធីអាវុធ និងអភិវឌ្ឍន៍កម្មវិធីយោធា។