ខណៈជម្លោះជុំចុងក្រោយរវាងអ៊ីស្រាអែល និងក្រុមហាម៉ាស បានអូសបន្លាយពេលជាងមួយឆ្នាំ ការវាយប្រលុកតាមអាកាស និងការបាញ់ផ្លោងរបស់អ៊ីស្រាអែល បានបណ្តាលឱ្យមានការបំផ្លិចបំផ្លាញ ការស្លាប់និងរងរបួសជនស៊ីវិល និងការភៀសខ្លួនដោយបង្ខំកាន់តែច្រើនឡើង នៅក្នុងតំបន់ហ្កាហ្សាស្ទ្រីប ជាពិសេសនៅក្នុងទីក្រុងដូចជា Khan Younis និងទីក្រុង Rafah ។

ដោយរងផលប៉ះពាល់ខ្លាំងពីប្រតិបត្តិការយោធារបស់អ៊ីស្រាអែល ពលរដ្ឋប៉ាឡេស្ទីនកំពុងកាន់ទុក្ខចំពោះការបាត់បង់មនុស្សជាទីស្រលាញ់របស់ពួកគេ និងទប់ទល់ជាមួយផលវិបាកដ៏អាក្រក់ជារៀងរាល់ថ្ងៃ។ អ្នកដែលរងរបួសក្នុងការវាយប្រហារតាមអាកាស និងការបាញ់ផ្លោងរបស់អ៊ីស្រាអែល ជារឿយៗប្រឈមមុខទៅនឹងការទទួលបានសេវាថែទាំផ្នែកវេជ្ជសាស្ត្រមានកម្រិត ដោយសារតែជម្លោះនៅបន្ត។

វាត្រូវបានគេប៉ាន់ប្រមាណថា ប្រហែល៨០ភាគរយនៃហេដ្ឋារចនាសម្ព័ន្ធនៅតំបន់ហ្កាហ្សា ត្រូវបានបំផ្លាញ ឬរងការខូចខាតធ្ងន់ធ្ងររហូតមកដល់ពេលនេះ ដោយសារតែការទម្លាក់គ្រាប់បែកកាន់តែខ្លាំង រួមទាំងទៅលើហេដ្ឋារចនាសម្ព័ន្ធស៊ីវិលសំខាន់ៗ ដូចជាអគារលំនៅឋាន មណ្ឌលថែទាំសុខភាព ការផ្គត់ផ្គង់អគ្គិសនី និងការផ្គត់ផ្គង់ទឹក សាលារៀន អគារអប់រំ ផ្លូវថ្នល់ និងស្ពាន ព្រមទាំងសេវាសាធារណៈ។

ទំហំនៃការបំផ្លិចបំផ្លាញ បានបង្កឱ្យមានការព្រួយបារម្ភផ្នែកមនុស្សធម៌យ៉ាងខ្លាំង ខណៈការបិទផ្លូវ និងការវាយប្រហារតាមផ្លូវអាកាស ធ្វើឱ្យសហគមន៍អន្តរជាតិមានការលំបាកក្នុងការផ្តល់ជំនួយចាំបាច់ដល់អ្នកដែលរងផលប៉ះពាល់។

តម្រូវការមនុស្សធម៌ និងការកសាងឡើងវិញនៅតំបន់ហ្កាហ្សា មានច្រើនលើសលប់ ខណៈមនុស្សរាប់ពាន់នាក់បានបាត់បង់ជីវិត ហើយគ្រួសារភៀសខ្លួនចេញពីជម្លោះមានរាប់មិនអស់។