នាយករដ្ឋមន្ត្រីអ៊ីស្រាអែល លោក Benjamin Netanyahu បានចាប់ផ្តើមឆ្នាំថ្មី ឆ្នាំ២០២៤ ជាមួយនឹងស្ថានភាពនយោបាយកម្រិតទាប ដោយរងការរិះគន់ ពាក់ព័ន្ធនឹងការដោះស្រាយរបស់លោក ចំពោះការវាយប្រហារបង្ហូរឈាម កាលថ្ងៃទី៧ ខែតុលា ឆ្នាំ២០២៣ ហើយរហូតដល់មានអ្នកខ្លះចោទលោកថា បានជួយដល់ក្រុមហាម៉ាសទៀតផង។ ការគាំទ្រ ចំពោះគណបក្ស Likud របស់លោក បានធ្លាក់ចុះ ហើយរូបលោកផ្ទាល់ បានប្រឈមនឹងការចោទប្រកាន់ពីបទពុករលួយ និងការចោទប្រកាន់ពីបទប្រល័យពូជសាសន៍ ក្នុងពេលបន្តមានជម្លោះ និងការស្លាប់កាន់តែច្រើនឡើងៗ ក្នុងតំបន់ហ្កាហ្សា។

តែទោះបីជាមានបញ្ហាប្រឈមទាំងនេះក៏ដោយ ក៏លោក Netanyahu បានជោគជ័យ ក្នុងការគ្រប់គ្រងឲ្យមានស្ថិរភាព ក្នុងប្រទេសរបស់លោក ដោយឈរយ៉ាងរឹងមាំបង្ហាញខ្លួនឯងថា ជាអ្នកការពារតែម្នាក់គត់ ចំពោះសន្តិសុខអ៊ីស្រាអែល។ ការស្ទង់មតិបង្ហាញថា គណបក្ស Likud ទទួលបានការគាំទ្រឡើងវិញ ហើយលោក Netanyahu បានធ្វើឲ្យក្រុមរដ្ឋាភិបាលចម្រុះរបស់លោកស្ងប់ចិត្ត។ ហើយយុទ្ធនាការយោធា នៅប្រទេសលីបង់ និងស៊ីរី បានជួយលើកកម្ពស់មុខមាត់របស់លោកជា «Mr. Security» (អ្នកការពារសន្តិសុខ) ទោះបីជាមានការរិះគន់ និងការចោទប្រកាន់ពីការប្រព្រឹត្តិឧក្រិដ្ឋកម្មសង្គ្រាមដោយ ICC (តុលាការឧក្រិដ្ឋកម្មអន្តរជាតិ) ក៏ដោយ។

នៅលើឆាកអន្តរជាតិ អ៊ីស្រាអែលប្រឈមនឹងការរិះគន់កាន់តែខ្លាំងឡើងៗ ទោះបីជាជំនួយយោធារបស់សហរដ្ឋអាមេរិក នៅតែបន្តមានស្ថិរភាពក៏ដោយ។ មតិសាធារណៈ នៅក្នុងបណ្តាប្រទេសលោកខាងលិច បង្ហាញពីភាពមិនស្របគ្នា ប៉ុន្តែមានការផ្លាស់ប្តូរគួរឲ្យកត់សម្គាល់តិចតួច ក្នុងឆ្នាំនេះ។ ក្នុងប្រទេស ទស្សនសាធារណៈ នៅតែមានភាពច្របូកច្របល់ ដោយជនជាតិអ៊ីស្រាអែលជាច្រើនចាត់ទុកស្ថានភាពរបស់ប្រទេសថា មានសភាពធ្ងន់ធ្ងរគួរឲ្យបារម្ភ។

លោក Netanyahu បញ្ចប់ឆ្នាំនេះនៅក្នុងស្ថានភាពនយោបាយដ៏រឹងមាំ ប៉ុន្តែអនាគតរបស់លោក គឺមិនប្រាកដប្រជា ដោយការជំនុំជម្រះក្ដីអំពើពុករលួយកំពុងបន្តប្រព្រឹត្តទៅ ក្រុមចម្រុះរបស់លោកមានភាពផុយស្រួយ ហើយការគំរាមកំហែង ក្នុងតំបន់ នៅបន្តគ្របដណ្ដប់មិនទាន់រលាយបាត់ទាំងស្រុងនោះឡើយ៕