នគរបាលហ្វាំងឡង់ នៅថ្ងៃព្រហស្បតិ៍ (ទី២៦ ខែធ្នូ) បានប្រាប់ឲ្យដឹងថា ពួកគេកំពុងស៊ើបអង្កេតថា តើនាវាបរទេសមានជាប់ពាក់ព័ន្ធនឹងការខូចខាតខ្សែកាបថាមពលក្រោមបាតសមុទ្រ ដែលតភ្ជាប់ប្រទេសហ្វាំងឡង់ និងអេស្តូនីដែរ ឬយ៉ាងណា បន្ទាប់ពីមានការដាច់ចរន្តអគ្គិសនីភ្លាមៗ កាលពីថ្ងៃពុធ (ទី២៥ ខែធ្នូ)។

គួរបញ្ជាក់ថា បណ្តាប្រទេស នៅសមុទ្របាល់ទិក កំពុងមានការប្រុងប្រយ័ត្នខ្ពស់ ចំពោះសកម្មភាពដែលអាចកើតមាន ពាក់ព័ន្ធនឹងអំពើវិឆ្ឆេទកម្ម បន្ទាប់ពីមានការដាច់ខ្សែថាមពល បណ្តាញទំនាក់ទំនងទូរគមនាគមន៍ និងបំពង់បង្ហូរឧស្ម័ន គិតចាប់តាំងពីឆ្នាំ២០២២ សូម្បីតែឧបករណ៍នៅក្រោមបាតសមុទ្រ ក៏ទទួលរងនូវការខូចបច្ចេកទេស និងមានឧបទ្ទវហេតុផងដែរ។

ប្រតិបត្តិករ Fingrid បានប្រាប់ថា ឧបករណ៍ភ្ជាប់ថាមពល 658MW Estlink 2 នៅតែមិនដំណើរការដដែល បន្ទាប់ពីមានការដាច់ចរន្តអគ្គិសនី ដែលបានចាប់ផ្តើមនៅថ្ងៃត្រង់ តាមពេលវេលាម៉ោងក្នុងស្រុក កាលពីថ្ងៃទី២៥ ខែធ្នូ ដោយមានតែខ្សែ 358MW Estlink 1 ដែលកំពុងដំណើរការ រវាងប្រទេសទាំង២។

នគរបាលហ្វាំងឡង់បានឲ្យដឹងនៅក្នុងសេចក្តីថ្លែងការណ៍ថា៖ «នគរបាល ដោយបានសហការជាមួយឆ្មាំព្រំដែន និងអាជ្ញាធរផ្សេងទៀត កំពុងស៊ើបអង្កេតព្រឹត្តិការណ៍ជាបន្តបន្ទាប់នៃឧប្បត្តិហេតុនេះ»។ នគរបាលបានបន្ថែមថា ក្រុមអ្នកស៊ើបអង្កេតកំពុងស៊ើបអង្កេតតួនាទីរបស់នាវាបរទេសដែលអាចមាន តែមិនបានបញ្ចេញឈ្មោះនាវានោះទេ៕