ប្រទេសលីបង់ នៅថ្ងៃព្រហស្បតិ៍ (ទី២៦ ខែធ្នូ) បានឲ្យដឹងថា ខ្លួនកំពុងទន្ទឹងរង់ចាំពីការមានទំនាក់ទំនងជាអ្នកជិតខាងដ៏ល្អបំផុតជាមួយប្រទេសស៊ីរី ជាសារផ្លូវការដំបូងរបស់ខ្លួនទៅកាន់រដ្ឋបាលថ្មី នៅទីក្រុងដាម៉ាស។

តាមរយៈបណ្ដាញសង្គម X ក្រសួងការបរទេសលីបង់ បានឲ្យដឹងថា រដ្ឋមន្ត្រីការបរទេសលីបង់ លោក Abdallah Bou Habib បានផ្ញើសារនេះទៅកាន់សមភាគីស៊ីរីរបស់លោក គឺលោក Asaad Hassan al-Shibani នៅក្នុងការជជែកគ្នាតាមទូរសព្ទ។ 

ក្រុមហេសបូឡាដែលគាំទ្រដោយអ៊ីរ៉ង់របស់ប្រទេសលីបង់ បានដើរតួនាទីយ៉ាងសំខាន់ ក្នុងការជួយគាំទ្រប្រធានាធិបតីស៊ីរី លោក Bashar al-Assad ដែលត្រូវបានទម្លាក់ចេញពីអំណាច តាមរយៈសង្រ្គាមជាច្រើនឆ្នាំ មុនពេលនាំយកយុតញធជនរបស់ខ្លួនត្រឡប់ទៅលីបង់ កាលពីឆ្នាំមុន ដើម្បីទៅប្រយុទ្ធក្នុងសង្គ្រាមដ៏ខ្លាំងក្លាជាមួយអ៊ីស្រាអែល ជាការដកចេញកងកម្លាំងដែលនាំឲ្យសមរភូមិជួរមុខរបស់រដ្ឋាភិបាលស៊ីរីចុះខ្សោយ។

គួររំលឹកថា ក្រោមការដឹកនាំរបស់លោក Assad ក្រុមហេបូឡាបានប្រើប្រាស់ដែនដីស៊ីរី ដើម្បីនាំយកអាវុធ និងគ្រឿងយុទ្ធោបករណ៍ផ្សេងទៀតពីអ៊ីរ៉ង់ ឆ្លងកាត់អ៊ីរ៉ាក់ និងស៊ីរី ហើយចូលទៅលីបង់។ ប៉ុន្តែនៅថ្ងៃទី៦ ខែធ្នូ ក្រុមយុទ្ធជនប្រឆាំងលោក Assad បានវាយដណ្តើមកាន់កាប់ព្រំដែនជាមួយអ៊ីរ៉ាក់ និងកាត់ផ្តាច់ផ្លូវឆ្លងកាត់នោះ ហើយ ២ថ្ងៃក្រោយមក ពួកឧទ្ទាមអ៊ិស្លាមនិយម បានដណ្តើមគ្រប់គ្រងរដ្ឋធានីដាម៉ាសទាំងស្រុងតែម្ដង។

មេដឹកនាំជាក់ស្ដែងឥស្លាមនិយមថ្មីរបស់ស៊ីរី លោក Ahmed al-Sharaa កំពុងប្រឹងប្រែងបង្កើតទំនាក់ទំនងជាមួយបណ្ដាមេដឹកនាំអារ៉ាប់ និងលោកខាងលិច បន្ទាប់ពីផ្តួលរំលំលោក Assad៕