នៅថ្ងៃព្រហស្បតិ៍នេះ ថៃបានប្រារព្ធខួបលើកទី ២០នៃរលកយក្សស៊ូណាមិក្នុងមហាមសុទ្រឥណ្ឌាកាលពីឆ្នាំ ២០០៤ វាយប្រហារខេត្តភាគខាងត្បូង Phang Nga ដោយមានការរៀបចំពិធីតាមសាសនា ដើម្បីរំឭកដល់វិញ្ញាណក្ខន្ធជនរងគ្រោះដោយសារគ្រោះមហន្តរាយដ៏អាក្រក់មួយនេះ ។

មនុស្សរាប់រយនាក់ បានធ្វើដំណើរទៅកាន់ជញ្ជាំងរំឭកអនុស្សាវរីយ៍ស៊ូណាមិ ស្ថិតនៅជិតភូមិ Ban Nam Khem ជាទីដែលពិធីត្រូវបានរៀបចំឡើង ដើម្បីគោរពដល់វិញ្ញាក្ខន្ធមនុស្សជាទីស្រលាញ់ដែលបានបាត់បង់អាយុជីវិតរបស់ពួកគេ ។

ខេត្ត Phang Nga ស្ថិតក្នុងចំណោមខេត្តរងផលប៉ះពាល់ខ្លាំងបំផុតដោយសាររលកស៊ូណាមិនៅក្នុងប្រទេសថៃ ក្នុងនោះមនុស្ស ៥.៤០០នាក់ បានបាត់បង់អាយុជីវិតរបស់ពួកគេនៅទីនោះ រួមទាំងភ្ញៀវទេសចរបរទេសផងដែរ ។

អ្នកស្រី Urai Sirisuk វ័យ ៦២ឆ្នាំ គឺជាពលរដ្ឋថៃមួយរូបដែលបាត់បង់កូនស្រីអាយុ ៤ឆ្នាំរបស់គាត់កាលពីរយៈពេល ២០ឆ្នាំមុនដោយសាររលកយក្សស៊ូណាមិ ស្ថិតក្នុងចំណោមមនុស្សដែលបានទៅគោរពវិញ្ញាក្ខន្ធជនរងគ្រោះ ។

អ្នកស្រីនិយាយថា គាត់មិនចង់មកទីនេះទៀតទេ ។ គាត់មិនមកនោះទេ បើសិនជាពុំចាំបាច់ទេនោះ គឺមិនមកជាដាច់ខាត ពីព្រោះថា សមុទ្របានយកកូនស្រីពីខ្ញុំនៅទីនេះ ។

ភូមិ Ban Nam Khem បានរងការបំផ្លិចបំផ្លាញដោយសាររលកយក្សស៊ូណាមិកាលពីឆ្នាំ ២០០៤ បង្កឡើងដោយសារការរញ្ជួយដីក្រិត ៩,១រ៉ិចទ័រ នៅជិតឆ្នេរខេត្ត Aceh របស់ប្រទេសឥណ្ឌូនេស៊ី ដោយបានសម្លាប់មនុស្សប្រហែល ២៣ម៉ឺននាក់ នៅទូទាំងប្រទេសឥណ្ឌូនេស៊ី ស្រីលង្កា ឥណ្ឌា ថៃ និងប្រទេសចំនួន ៩ផ្សេងទៀត ៕