ការិយាល័យរដ្ឋអាជ្ញា បានឱ្យដឹងនៅក្នុងសេចក្តីថ្លែងការណ៍មួយថា រដ្ឋមន្ត្រីសន្តិសុខបូស្នី លោក Nenad Nesic ត្រូវបានចាប់ខ្លួន នៅថ្ងៃព្រហស្បតិ៍ (ទី២៦ ខែធ្នូ) នេះ រួមជាមួយមនុស្ស ៦នាក់ផ្សេងទៀត ជុំវិញការប្រព្រឹត្តិបទល្មើសព្រហ្មទណ្ឌ ដែលរួមទាំងការសម្អាតលុយកខ្វក់ ការរំលោភបំពានការិយាល័យ និងការទទួលសំណូក។

រដ្ឋអាជ្ញា និងក្រសួងមហាផ្ទៃនៃសាធារណរដ្ឋស៊ែប៊ី (RS) របស់បូស្នី បាន និងកំពុងស៊ើបអង្កេតលើការសង្ស័យ ដែលថា មានអំពើពុករលួយ នៅឯក្រុមហ៊ុនសាធារណៈ Roads of RS ដែលលោក Nesic ជាអ្នកគ្រប់គ្រងទូទៅពីឆ្នាំ២០១៦ ដល់ឆ្នាំ២០២០។

អ្នកគ្រប់គ្រងទូទៅបច្ចុប្បន្នរបស់ក្រុមហ៊ុននេះ គឺលោក Milan Dakic ក៏ត្រូវបានចាប់ខ្លួនផងដែរ រួមជាមួយនឹងលោក Mladen Lucic ដែលជាបងប្រុសរបស់អតីតរដ្ឋមន្ត្រីរូបនោះ។

ភ្លាមៗនេះ គ្មានអ្នកណាម្នាក់មកពីក្រុមហ៊ុននេះ អាចធ្វើការអត្ថាធិប្បាយអ្វីបានឡើយ។ លោក Nesic លោក Dakic និងលោក Lucic មិនអាចទាក់ទងសុំការអត្ថាធិប្បាយបាននោះទេ។ ជាមួយគ្នានេះ អយ្យការមិនបានបញ្ចេញឈ្មោះមនុស្ស ៤នាក់ផ្សេងទៀតដែលត្រូវបានចាប់ខ្លួនដូចគ្នានោះដែរ។

ប្រមុខ RS លោក Milorad Dodik ដែលខ្លួនលោកផ្ទាល់ត្រូវបានកាត់ទោសនៅក្នុងតុលាការរដ្ឋរបស់បូស្នី ពីបទប្រឆាំងនឹងការសម្រេចរបស់បេសកជនសន្តិភាពអន្តរជាតិ លោក Christian Schmidt បានចោទប្រកាន់ការិយាល័យរបស់រដ្ឋអាជ្ញាថា មានយុទ្ធនាការធ្វើទុក្ខបុកម្នេញប្រឆាំងនឹងមន្ត្រីរដ្ឋាភិបាលស៊ែប៊ី៕