កំពង់ធំ ៖ ផ្លូវជនបទក្រាលបេតុង១ខ្សែ ស្ថិតក្រោមក្របខណ្ឌក្រសួងអភិវឌ្ឍន៍ជនបទ នៅឃុំកំពង់ចិនត្បូង ស្រុកស្ទោង ខេត្តកំពង់ធំ បានរក្សា នូវគុណភាពល្អប្រសើរ ដោយបានបង្កើតនូវបរិយាកាសអំណោយផល សម្រាប់សម្រួលដល់ការធ្វើដំណើរ និងការរកស៊ីទទួលទានផ្សេងៗ របស់ប្រជាពរដ្ឋនៅក្នុងមូលដ្ឋាននោះ។

​ទាក់ទិនការអភិវឌ្ឍជនបទ, រាជរដ្ឋាភិបាលបានយកចិត្តទុកដាក់យ៉ាងខ្លាំង ដោយបាននិងកំពុងជំរុញការអភិវឌ្ឍទាំងផ្នែក សេដ្ឋកិច្ច និងសង្គមកិច្ច, ដើម្បីលើកកម្ពស់គុណភាពនៃជីវិតរបស់ប្រជាជន និងប្រែក្លាយជនបទឱ្យទៅជាតំបន់មានភាពរីកចម្រើន, ជឿនលឿន, និងស៊ីវីល័យ, ស័ក្តិសមជាជនបទនៃប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងប្រាក់ចំណូលខ្ពស់ នៅឆ្នាំ២០៥០។

ជុំវិញការអភិវឌ្ឍជនបទ, ឯកឧត្តម សាន វិសាល រដ្ឋលេខាធិការក្រសួងអភិវឌ្ឍន៍ជនបទ នៅថ្ងៃទី២៦ ខែធ្នូ នេះ បានដឹកនាំ គណៈកម្មកាអន្តរក្រសួង ចុះត្រួតពិនិត្យ វាយតម្លៃបញ្ចប់សុពលភាព លើការងារស្ថាបនាផ្លូវក្រាលបេតុងចំនួន ១ ខ្សែ ប្រវែង ១ ៧០០ ម៉ែត្រ និងផ្លាកឈ្មោះផ្លូវចំនួន ២កន្លែង ស្ថិតនៅភូមិលាបទង ភូមិកំពង់ក្តី និងភូមិកំពង់ចិន ឃុំកំពង់ចិនត្បូង ស្រុកស្ទោង ខេត្តកំពង់ធំ ក្នុងនោះឯកឧត្តមបានវាយតម្លៃខ្ពស់ចំពោះនាយកដ្ឋានផ្លូវលំជនបទ ដែលបានខិតខំប្រឹងប្រែងថែទាំផ្លូវនេះ រក្សាគុណភាពល្អប្រសើរ បច្ចុប្បន្នផ្លូវនេះបានជំរុញបង្កើតបរិយាកាសអំណោយផលគ្រប់បែបយ៉ាង ទាំងការធ្វើដំណើរ និងការរកស៊ីទទួលទានផ្សេងៗ ដែលនេះ ជាការលើកកម្ពស់កម្រិតជីវភាពរបស់ប្រជាពលរដ្ឋឱ្យកាន់តែប្រសើរ ស្របពេលរាជរដ្ឋាភិបាលបាននិងកំពុងបន្តកែលម្អលក្ខខណ្ឌ នៃ ការរស់នៅរបស់សហគមន៍ជនបទ តាមរយៈការលើកកម្ពស់ការផ្តល់សេវាសង្គមនានារួមមាន៖ សេវាអប់រំ, សេវាសុខាភិបាល, សេវាទឹក ស្អាត, អនាម័យ, ទូរគមនាគមន៍ជាដើម។

ចំណែកក្នុងជំនួបសំណេះសំណាលជាមួយអាជ្ញាធរ និងប្រជាពលរដ្ឋ, ឯកឧត្តមរដ្ឋលេខាធិការ ក៏បានរំលេចអំពីរាជរដ្ឋាភិបាល នីតិកាលទី៧ នៃរដ្ឋសភា ដែលដឹកនាំប្រកបដោយថាមពល របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី, ដោយក្នុងនោះ រាជរដ្ឋាភិបាលបានដាក់ចេញនូវកម្មវិធីនយោបាយយ៉ាងច្បាស់លាស់ ជាក់ស្តែងសម្រាប់ការអភិវឌ្ឍជនបទ, រាជរដ្ឋាភិបាលនិងបន្តជំរុញ ការលើកកម្ពស់ជីវភាពប្រជាជននៅជនបទ តាមរយៈការស្តារ, ការស្ថាបនាហេដ្ឋារចនាសម្ព័ន្ធគមនាគមន៍ដឹកជញ្ជូននៅជនបទ, និង ការលើកកម្រិតផ្លូវជនបទពីផ្លូវក្រាលក្រួសក្រហម ទៅជាផ្លូវក្រាលកៅស៊ូ ឬផ្លូវបេតុង សំដៅធានាបានការប្រើប្រាស់យូរអង្វែង ធន់នឹង ការប្រែប្រួលអាកាសធាតុ ដើម្បីជំរុញដំណើរអន្តរកម្មផ្នែកសង្គម-សេដ្ឋកិច្ច និងការផ្សារភ្ជាប់សកម្មភាពធុរកិច្ចផ្សេងៗ រវាងតំបន់ជនបទ និងទីប្រជុំជនជាដើម។ ជុំវិញការអភិវឌ្ឍជនបទ, ផ្លូវបេតុងមួយខ្សែនេះ ពិតជាបានចូលរួមចំណែកលើកកម្ពស់ប្រជាពលរដ្ឋ មានផ្លូវល្អ សម្រួលការធ្វើដំណើរបានលឿន និងធ្វើឱ្យប្រជាពលរដ្ឋនៅក្នុងមូលដ្ឋាននេះ បង្កើតមុខរបររស៊ីទទួលទានផ្សេងៗកាន់តែច្រើន៕

អត្ថបទ៖សុនរ៉ាឌី