នាយឧត្តមសេនីយ៍ ណឹម សុវត្ថិ អគ្គនាយក អគ្គនាយកដ្ឋាននយោបាយ និងកិច្ចការបរទេស និង​ជា​ប្រធាន​ក្រុមការងារសិក្សាស្រាវជ្រាវសាងសង់វិមានឈ្នះ ឈ្នះ បានលើកឡើងថា ប្រសិន​បើ​គ្មាន​នយោបាយឈ្នះ ឈ្នះ របស់សម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជាទេនោះ ការ​បញ្ចប់​សង្រ្គាម​នៅ​កម្ពុជាមិនងាយស្រួល​នោះឡើយ ហើយ​បច្ចុប្បន្ន​សន្តិភាព​គឺ​បាន​កំពុង​លេច​ខ្ពស់​ត្រដែត​សម្រាប់​កម្ពុជា​ក្នុងដំណាក់កាលជាបន្តបន្ទាប់មកនេះ ខណៈគុណតម្លៃ នៃសន្តិភាព ដែល​បាន​មក​ដោយ​គោល​នយោបាយឈ្នះ ឈ្នះ គឺមានសារៈសំខាន់​ខ្លាំង​ណាស់​សម្រាប់​ប្រជាជន​កម្ពុជា​។

ក្នុងកិច្ចសម្ភាសន៍ជាមួយអ្នកសារព័ត៌មាន ស្តីពីវឌ្ឍនភាពនៃការសាងសង់វិមានឈ្នះ ឈ្នះ និង​ការ​រៀបចំ​អបអរសាទរខួប២៦ឆ្នាំ នៃទិវា«សន្តិភាព»នៅកម្ពុជា នាយឧត្តមសេនីយ៍ ណឹម សុវត្ថិ បាន​រំលេច​អំពី​គុណបំណាច់ និងការលះបង់របស់សម្តេចតេជោ ហ៊ុន សែន ទាំងកម្លាំងកាយចិត្ត ដើម្បី​បុព្វ​ហេតុ​ជាតិ​មាតុភូមិ រហូតបានធ្វើឲ្យកម្ពុជាទទួលបានសុខសន្តិភាពពិតប្រាកដនៅថ្ងៃទី២៩ ខែ​ធ្នូ ឆ្នាំ១៩៩៨នោះ។

នាយឧត្តមសេនីយ៍ បានបញ្ជាក់បន្ថែមថា ការអនុវត្តន៍ដ៏ជោគជ័យនៃ នយោបាយឈ្នះ ឈ្នះ និង ជា​មេរៀនក្នុងប្រវត្តិសាស្រ្ត ដែលបានទទួលអំពីនយោបាយឈ្នះ ឈ្នះ ទាំងយុទ្ធសាស្រ្ត យុទ្ធវិធី និង​ទាំង​ប្រតិបត្តិ ហើយការសាងសង់នូវិមានឈ្នះ ឈ្នះ នៅភ្នំពេញ ឧត្តរមានជ័យ ប៉ៃលិន និង​ខេត្ត​កោះកុង​នេះ គឺបានរៀបរាប់ និងចង់ក្រងអំពីដំណើរការ នៃនយោបាយឈ្នះ ឈ្នះ ដែល​បាន​នាំ​ឲ្យ​កម្ពុជា​មានសុខសន្តិភាព ពេញលេញពិតប្រាកដនោះ។

នាយឧត្តមសេនីយ៍ ណឹម សុវត្ថិ ក៏បានលើកឡើងផងដែរថា គុណតម្លៃ នៃ​សន្តិភាព​ដែល​កើត​ចេញ​ពី​នយោបាយ​ឈ្នះ ឈ្នះនេះ គឺ​ពិត​ជា​មាន​សារៈសំខាន់ខ្លាំងណាស់ ហើយ​សំឡេង នៃ​សន្តិភាព​នៅ​កម្ពុជា ជាមួយនិងនយោបាយឈ្នះ ឈ្នះនេះ គឺបានផ្តល់នូវការអភិវឌ្ឍ ហើយ​បាន​ផ្តល់​នូវ​យុទ្ធសាស្រ្ត​ថ្មីទៀតសម្រាប់បន្តការការពារសន្តិភាពទៅមុខទៀតដ៏យូរអង្វែង។

សូមបញ្ជាក់ថា បើគិតត្រឹមថ្ងៃទី២៩ ខែធ្នូ ឆ្នាំ២០២៤នេះ គឺមានរយៈពេល២៦ឆ្នាំហើយ (២៩ធ្នូ ឆ្នាំ​១៩៩៨ ២៩ ធ្នូ ឆ្នាំ២០២៤) ជាថ្ងៃសច្ចភាពនៃប្រវត្តិសាស្ត្រ ដែល​កម្ពុជា​បាន​បញ្ចប់​សង្រ្គាម​ស៊ីវិល​ទាំង​ស្រុង ទទួលបានសន្តិភាពពេញផ្ទៃប្រទេសក្រោមឆ័ត្រនយោបាយ ឈ្នះ ឈ្នះ របស់​សម្តេច​តេជោ ហ៊ុន សែន អតីតនាយករដ្ឋមន្រ្តីនៃកម្ពុជា និងបច្ចុប្បន្នជាប្រធានព្រឹទ្ធសភា ហើយ​ក៏​ត្រូវ​ជា​ខួប​១​ឆ្នាំ​គត់ ក្រោយរាជរដ្ឋាភិបាលចេញអនុក្រឹត្យកំណត់យកថ្ងៃទី២៩ ខែធ្នូ ជារៀងរា​ល់​ឆ្នាំ​ជា ​«ទិវាសន្តិភាពនៅកម្ពុជា»ផងដែរនោះ៕ អត្ថបទ៖ បាន ចក់