រដ្ឋាភិបាលរបស់ប្រទេសប៉េរូ កាលពីថ្ងៃព្រហស្បតិ៍ (២៦ ធ្នូ) បានប្រកាសភាពអាសន្នផ្នែកបរិស្ថាននៅក្នុងតំបន់ឆ្នេរភាគខាងជើង ជាទីដែលក្រុមហ៊ុនប្រេងរដ្ឋ ប៉េត្រូប៉េរូ (Petroperu) កាលពីចុងសប្តាហ៍មុន បានលេចធ្លាយប្រេងក្នុងការដឹកជញ្ជូនប្រេងឆៅ ចូលទៅក្នុងដែនទឹកជុំវិញមហាសមុទ្រប៉ាស៊ីហ្វិក។

នាវាមួយគ្រឿងដែលធ្លាប់ហាត់សមមុនពេលដឹកជញ្ជូននោះ បានបណ្តាលឱ្យហៀរប្រេងកាលពីថ្ងៃសៅរ៍សប្ដាហ៍មុន នៅស្ថានីយរោងចក្រចម្រាញ់ប្រេង តាឡារ៉ា (Talara) របស់ប៉េរូ នៅភាគខាងជើងប្រទេស។

Petroperu មិនបាននិយាយថាចំនួនប្រេងឆៅប៉ុន្មានត្រូវបានកំពប់ចូលទៅក្នុងសមុទ្រទេ ប៉ុន្តែក្រុមឃ្លាំមើលបរិស្ថានរបស់ប៉េរូ OEFA បាននិយាយនៅក្នុងរបាយការណ៍បឋមថា ឧបទ្ទវហេតុនោះបានប៉ះពាល់ដល់ផ្ទៃទឹកសមុទ្រប្រហែល ១០.០០០ម៉ែត្រក្រឡា ហើយក្រសួងបរិស្ថាននិយាយថា វាប៉ះពាល់ដល់ឆ្នេរយ៉ាងហោចណាស់៧កន្លែង ក៏ដូចជាសត្វព្រៃក្នុងស្រុកផងដែរ។

ក្រសួងបរិស្ថានប៉េរូ បញ្ជាក់ថា គ្រាអាសន្នរយៈពេល ៩០ថ្ងៃនេះ មានគោលបំណង "ធានានូវការគ្រប់គ្រងប្រកបដោយនិរន្តរភាពនៃតំបន់នេះ និងការអនុវត្តការងារស្តារ និងជួសជុលឡើងវិញ ដើម្បីកាត់បន្ថយកង្វក់ ឬការបំពុលបរិស្ថាន"៕