សេវាសន្តិសុខសហព័ន្ធ FSB របស់រុស្ស៊ី បាននិយាយកាលពីថ្ងៃព្រហស្បតិ៍ (២៦ ធ្នូ) ថា ខ្លួនបានបំផ្លាញផែនការជាច្រើនដោយសេវាស៊ើបការណ៍សម្ងាត់អ៊ុយក្រែន SBU ក្នុងការប៉ុនប៉ងសម្លាប់មន្ត្រីជាន់ខ្ពស់រុស្ស៊ី និងក្រុមគ្រួសាររបស់ពួកគេនៅទីក្រុងមូស្គូ ដោយប្រើគ្រាប់បែកបង្កប់ក្នុងឧបករណ៍សាកថ្មចល័ត ផៅវើ ប៊ែង (Power Bank) ឬសាមីឯកសារ។

គួររម្លឹកថា កាលពីថ្ងៃទី១៧ ខែធ្នូ ចារកម្មអ៊ុយក្រែន SBU បានសម្លាប់ឧត្តមសេនីយ៍ឯក Kirillov ប្រធានកងការពារនុយក្លេអ៊ែរ ជីវសាស្ត្រ និងគីមីសាស្រ្តរបស់រុស្ស៊ី នៅទីក្រុងមូស្គូ នៅខាងក្រៅអគារផ្ទះល្វែង ដោយការបំផ្ទុះគ្រាប់បែកដែលភ្ជាប់ទៅនឹងម៉ូតូអគ្គិសនីខ្នាតតូច (Scooter)។

ប្រភព SBU បានបញ្ជាក់ប្រាប់រ៉យទ័រថា ទីភ្នាក់ងារស៊ើបការណ៍សម្ងាត់អ៊ុយក្រែន ជាអ្នកនៅពីក្រោយការវាយប្រហារនេះ។ ចារកម្មរុស្ស៊ី FSB ដែលជាអ្នកស្នងតំណែងដ៏សំខាន់របស់ KGB សម័យសូវៀត បាននិយាយថា ពលរដ្ឋរុស្ស៊ី ត្រូវបានជួលដោយចារកម្មអ៊ុយក្រែន ដើម្បីអនុវត្តផែនការនោះ។

FSB និយាយថា បុរសម្នាក់បានយកគ្រាប់បែកដែលបង្កប់ក្នុង Power Bank នៅទីក្រុងមូស្គូ ដែលមាន បំណងដាក់ភ្ជាប់ជាមួយមេដែកទៅនឹងរថយន្តរបស់មន្ត្រីជាន់ខ្ពស់ម្នាក់របស់ក្រសួងការពារជាតិ។ បុរសជនជាតិរុស្សីម្នាក់ទៀត ទទួលភារកិច្ចក្នុងការឈ្លបយកការណ៍របស់មន្ត្រីការពារជាតិជាន់ខ្ពស់រុស្ស៊ី ដោយមានគម្រោងបញ្ជូនគ្រាប់បែកដែលបង្កប់ថតឯកសារ។

ទីក្រុងមូស្គូ ចាត់ទុកអ៊ុយក្រែន ជាអ្នកទទួលខុសត្រូវសម្រាប់ការធ្វើឃាតដ៏ឥស្សរជនជាច្រើនលើទឹកដីរបស់ខ្លួន ដែលរៀបចំឡើងដើម្បីធ្វើឱ្យកម្លាំងរុស្ស៊ីចុះខ្សោយ ហើយនិយាយថា លោកខាងលិចកំពុងគាំទ្រ "របបភេរវករ" នៅក្នុងទីក្រុងគីវ៕