នៅក្នុងប្រទេសស៊ូដង់ ជម្លោះប្រដាប់អាវុធរយៈពេល ២០ ខែរវាងកងកម្លាំងគាំទ្ររហ័សប៉ារ៉ាយោធា (RSF)និងកងទ័ពស៊ូដង់(SAF)បានសម្លាប់មនុស្សជាង២០.០០០នាក់ និងបង្ខំឱ្យប្រជាជនប្រហែល២៥លាននាក់ ពាក់កណ្តាលនៃចំនួនប្រជាជនសរុបរបស់ប្រទេសនេះ ទទួលរងភាពអត់ឃ្លានធ្ងន់ធ្ងរ និងត្រូវការជំនួយមនុស្សធម៌ជាបន្ទាន់។

ទន្ទឹមនឹងនេះដែរ ពលរដ្ឋស៊ូដង់ ១៤ លាននាក់ត្រូវបានរត់គេចចេញពីទីលំនៅ ក្នុងនោះមានប្រហែល ៣,១ លាននាក់កំពុងស្វែងរកកន្លែងភៀសខ្លួននៅខាងក្រៅប្រទេស ភាគច្រើនក្នុងប្រទេសឆាដ ស៊ូដង់ខាងត្បូង អ៊ូហ្គង់ដា និងអេហ្ស៊ីប។ 

ស្របពេលជម្លោះនៅតែបន្តដុតកំឡោចប្រទេសនៅទ្វីបអាហ្វ្រិកមួយនេះ អ្នកនៅរស់រានមានជីវិតពីការរំលោភសេពសន្ថវៈ និងអំពើហិង្សាផ្លូវភេទផ្សេងទៀត កំពុងតស៊ូដើម្បីទទួលបានការព្យាបាលវេជ្ជសាស្ត្រ ឱសថសំខាន់ៗ និងសេវាជំនួយផ្លូវចិត្តជាដើម។

បច្ចុប្បន្ន កុមារកំពុងរងគ្រោះពីសង្រ្គាមដ៏ឃោរឃៅនេះ។ អំពើហិង្សាផ្លូវភេទក៏មានច្រើនក្នុងជម្លោះស៊ូដង់។

យោងតាមអង្គការវេជ្ជសាស្ត្រគ្រូពេទ្យគ្មានព្រំដែន MSF មនុស្សប្រហែលម្នាក់ ក្នុងចំណោម៦ នាក់ដែលត្រូវបានព្យាបាលនៅមន្ទីរពេទ្យ Bashair Teaching Hospital នៅស្រុក ខាទុំខាងត្បូងដោយសាររបួសទាក់ទងនឹងសង្រ្គាម ដូចជាការបាញ់កាំភ្លើង គ្រាប់ផ្លោង និងរបួសដោយការបំផ្ទុះជាដើម នៅចន្លោះខែមករាដល់ខែកញ្ញា ឆ្នាំ ២០២៤ មានអាយុ ១៥ ឆ្នាំ ឬតិចជាងនេះ៕