ប្រទេសរុស្ស៊ី កាលពីថ្ងៃព្រហស្បតិ៍ បានចោទប្រកាន់អង្គភាពសេវាសន្តិសុខអ៊ុយក្រែនថាបានបង្កជម្លោះដោយការលួចដុត និងការវាយប្រហារគ្រាប់បែកចំនួន៥៥លើក ទៅលើធនាគារ ការិយាល័យប្រៃសណីយ៍ និងរថយន្តនគរបាល នៅទូទាំងប្រទេស។

ក្រសួងមហាផ្ទៃ បាននិយាយនៅក្នុងសេចក្តីថ្លែងការណ៍ថា ជនសង្ស័យចំនួន៤៤នាក់ត្រូវបានចាប់ខ្លួន ដែលភាគច្រើនជាមនុស្សចាស់ និងអនីតិជនដែល «កំពុងស្វែងរកលុយដ៏ងាយស្រួលតាមរយៈអំពើទុច្ចរិត»។ ក្រសួងនិយាយថា ជនបង្កអាចប្រឈមនឹងការជាប់ពន្ធនាគាររហូតដល់២០ឆ្នាំ។

ជនសង្ស័យបានធ្វើសកម្មភាពតាមការណែនាំរបស់អ្នកគ្រប់គ្រងអនាមិក ដែលបានទទួលតាមរយៈទូរស័ព្ទ ឬការផ្ញើសារ។ ក្រសួងនិយាយថា «អង្គភាពសេវាសន្តិសុខអ៊ុយក្រែន គឺនៅពីក្រោយការរៀបចំឧក្រិដ្ឋកម្មទាំងនេះ» ដោយអំពាវនាវឱ្យមានការប្រុងប្រយ័ត្ន។

ក្រសួងបានបញ្ជាក់ថា «សកម្មភាពខុសច្បាប់» ចំនួន៥៥លើក ត្រូវបានរាយការណ៍នៅចន្លោះថ្ងៃទី១៨ ខែធ្នូ ដល់ថ្ងៃទី២៦ខែធ្នូ នៅក្នុងតំបន់ជាច្រើន។ ក្នុងវិធានការនានា ជនល្មើសបានញុះញង់ពលរដ្ឋឲ្យប្រព្រឹត្តបទឧក្រិដ្ឋ ដោយសន្យាផ្តល់រង្វាន់ជាលុយ»។

រុស្ស៊ី បានឃើញរលកនៃការបំផ្លិចបំផ្លាញ និងការវាយប្រហារទ្រង់ទ្រាយតូចៗជាច្រើន ចាប់តាំងពីខ្លួនបានចាប់ផ្តើមយុទ្ធនាការ នៅក្នុងប្រទេសអ៊ុយក្រែន ឆ្នាំ២០២២។