អគ្គលេខាធិការអង្គការសហប្រជាជាតិ លោក Antonio Guterres កាលពីថ្ងៃព្រហស្បតិ៍ ទី២៦ ខែធ្នូ បានអំពាវនាវឱ្យមេដឹកនាំនយោបាយរបស់ប្រទេសម៉ូហ្សំប៊ិក បន្ធូរបន្ថយភាពតានតឹងដែលនាំឱ្យមានភាពចលាចលស៊ីវិលពាក់ព័ន្ធទៅនឹងការបោះឆ្នោតដែលមានជម្លោះ កាលពីខែតុលា។

អ្នកនាំពាក្យរបស់ប្រមុខអង្គការសហប្រជាជាតិ បាននិយាយនៅក្នុងសន្និសីទសារព័ត៌មានថា «លោកអគ្គលេខាធិការ មានការព្រួយបារម្ភអំពីអំពើហិង្សាក្រោយការបោះឆ្នោត ដែលបានបណ្តាលឱ្យមានអ្នកបាត់បង់ជីវិត និងការបំផ្លិចបំផ្លាញទ្រព្យសម្បត្តិសាធារណៈ និងឯកជនអស់ជាច្រើន»។

សេចក្តីសម្រេចកាលពីថ្ងៃច័ន្ទរបស់តុលាការកំពូលប្រទេសម៉ូហ្សំប៊ិក ដែលបានបញ្ជាក់ពីជ័យជម្នះក្នុងការបោះឆ្នោតរបស់គណបក្ស Frelimo កំពុងកាន់អំណាចដ៏យូរ បានបង្កឱ្យមានការតវ៉ានៅទូទាំងប្រទេសធ្វើឡើងដោយក្រុមប្រឆាំង និងអ្នកគាំទ្ររបស់ពួកគេ ជាអ្នកដែលបាននិយាយថាការបោះឆ្នោតនេះត្រូវបានបន្លំ។

ទន្ទឹមនឹងនេះ កុបកម្ម នៅក្នុងពន្ធនាគារក្នុងរដ្ឋធានី Maputo របស់ប្រទេសម៉ូហ្សំប៊ិក បានបណ្តាលឲ្យមនុស្ស៣៣នាក់ស្លាប់ និង១៥នាក់រងរបួស កាលពីថ្ងៃពុធ ទី២៥ ខែធ្នូ។

ខណៈអគ្គស្នងការនគរបាល លោក Bernardino Rafael បានស្តីបន្ទោសការតវ៉ានៅខាងក្រៅពន្ធនាគារសម្រាប់ការជំរុញឲ្យមានកុបកម្មនៅខាងក្នុងនេះ ប៉ុន្តែរដ្ឋមន្ត្រីក្រសួងយុត្តិធម៌ លោក Helena Kida បានប្រាប់ទូរទស្សន៍ឯកជន Miramar TV ក្នុងស្រុក ថា ភាពចលាចល បានចាប់ផ្តើមនៅក្នុងពន្ធនាគារ ហើយពុំមានអ្វីពាក់ព័ន្ធនឹងការតវ៉ានៅខាងក្រៅនោះទេ។