ឧត្តមសេនីយ៍ឯក សុខ វាសនា អគ្គនាយកដ្ឋានអន្តោប្រវេសន៍ បានលើកឡើងពីបញ្ហា​ប្រឈម​មួយចំ​នួន នៃកិច្ចការងារគ្រប់គ្រងជនអន្តោប្រវេសន៍នៅកម្ពុជា ក្នុងនោះរួមមាន បញ្ហា​កង្វះ​មន្ត្រី​ជំនាញ ,បញ្ហាទីតាំងដាច់ស្រយាលមានជនបរទេសស្នាក់នៅ ដែលមាន​ការ​លំបាក​ក្នុង​ការ​ចុះ​ត្រួត​ពិនិត្យ និងបញ្ហាអាជ្ញាធរមូលដ្ឋាននៅស្ទាក់ស្ទើរក្នុងការផ្តល់លិខិត និងឯកសារបញ្ជាក់នានា តាម​ច្បាប់​កំណត់ជូនជនបរទេសអន្តោប្រវេសន្តស្របច្បាប់ជាដើម។

ការថ្លែង​បញ្ជាក់បែបនេះធ្វើឡើងនៅក្នុងពិធីបើកសន្និបាតបូកសរុបលទ្ធផលការងារឆ្នាំ២០២៤ និង​លើកទិសដៅការងារអនុវត្តបន្តឆ្នាំ២០២៥ របស់​អគ្គ​នាយកដ្ឋាន​អន្តោ​ប្រវេសន៍ នៃ​ក្រសួង​មហា​ផ្ទៃ នៅព្រឹកថ្ងៃទី ២៧ ខែធ្នូ ឆ្នាំ២០២៥ នៅទីស្តីការក្រសួងមហាផ្ទៃ ។

ឧត្តម​សេនីយ៍ឯក សុខ វាសនា ក៏បានពាំនាំនូវប្រសាសន៍ចង្អុលដឹកនាំដ៏ខ្ពង់ខ្ពស់របស់ ឯកឧត្ដម​អភិ​សន្តិ​បណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលបាន​គូស​បញ្ជាក់​ដោយ​សង្កត់​ធ្ងន់​ថា "យើងពុំគួរបន្តលើកឡើងជាបញ្ហាប្រឈមដដែលៗ ពីមួយឆ្នាំទៅមួយឆ្នាំ តទៅ​ទៀត​នោះ​ទេ ត្រូវរួមគ្នារិះរកវិធី និងយន្តការដោះស្រាយឱ្យអស់ពីលទ្ធភាព។ ដោយឯកឧត្តមបានលើកយកឧទាហរណ៍ខ្លះ ដែលជាបញ្ហា​ប្រឈម​ពាក់​ព័ន្ធ​សមត្ថកិច្ចរ​បស់​យើង​មក​បញ្ជាក់​ជូនដូចជា៖ បញ្ហាកង្វះមន្ត្រីជំនាញ យើងអាចពិចារណារៀប​ចំ​ និង​ផ្តល់​នូវ​ការ​បណ្តុះ​បណ្តាល បញ្ហាទីតាំងដាច់ស្រយាលមានជនបរទេសស្នាក់នៅ ដែលមាន​ការ​លំបាក​ក្នុង​ការ​ចុះ​ត្រួត​ពិនិត្យ ដែលយើងអាចសហការជាមួយអាជ្ញាធរមូលដ្ឋាន ដើម្បីទៅឱ្យដល់ និងត្រួត​ពិនិត្យ​ឱ្យ​បាន​ម៉ត់ចត់ និងបញ្ហាអាជ្ញាធរមូលដ្ឋាននៅស្ទាក់ស្ទើរក្នុងការផ្តល់លិខិត/ឯកសារបញ្ជាក់នានា តាម​ច្បាប់​កំណត់ជូនជនបរទេសអន្តោប្រវេសន្តស្របច្បាប់ ដែលយើងអាច​ធ្វើ​បាន​តាមរយៈ​ការ​បន្ត​ចុះ​ផ្សព្វ​ផ្សាយ​ពន្យល់ណែនាំជូនអាជ្ញាធរមានសមត្ថកិច្ចឱ្យបានយល់ជ្រួតជ្រាបជាដើម ដែលបញ្ហា​ប្រឈម​ខាង​លើនេះ ត្រូវបានអូសបន្លាយអស់រយៈពេលជាច្រើនឆ្នាំ រហូតមកដល់បច្ចុប្បន្ន។

ឯកឧត្តមបានសង្កត់ធ្ងន់ថា ចំណុចខ្វះខាតទាំងនេះ ជាកត្តាខាងក្នុង រួមផ្សំ​មួយ​ផ្នែក​នៃ​ការ​បន្ត​លួច​ជ្រៀត​ចូល និងសម្ងំស្នាក់នៅដោយខុសច្បាប់ដោយជនបរទេសនៅក្នុងព្រះរាជាណាចក្រកម្ពុជា យើង​បន្តកើតមាន។ ជាមួយគ្នានេះ ឯកឧត្តម សុខ វាសនា បានពិនិត្យឃើញថា សកម្មភាព​ជួញ​ដូរ​គ្រឿង​ញៀន និងការនាំស្ត្រីខ្មែរទៅក្រៅប្រទេសខុសច្បាប់ ដោយពេល​កន្លង​ទៅ​យើង​បាន​ទប់ស្កាត់ និង បង្ក្រាបបានជាច្រើនករណីនៅតាមបណ្តាប៉ុស្តិ៍ច្រកទ្វារអន្តរជាតិ និង​ប៉ុស្តិ៍​ច្រក​ទ្វារ​ព្រំដែន​អន្តរជាតិ ហើយដែលករណីនេះក៏អាចកើតមានតាមបណ្តាច្រករបៀង និងដោយមធ្យោយ​ផ្សេង​ៗទៀតផងដែរ៕ អត្ថបទ៖ បាន ចក់