ទីប្រឹក្សារបស់លោកប្រធានាធិបតីកូរ៉េខាងត្បូង Yoon Suk Yeol បាននិយាយថា អ្នក​តំណាង​ផ្នែក​ច្បាប់​របស់លោក Yoon នឹងចូលរួមសវនាការលើកដំបូងរបស់តុលាការធម្មនុញ្ញនៅថ្ងៃសុក្រ (២៧ ធ្នូ) នេះ នៅក្នុងដំណើរការកាត់ក្តីមួយ ដែល​ពិនិត្យ​មើល​ញត្តិ​ចោទ​ប្រកាន់​ទម្លាក់​តំណែង​ពី​សភា ជុំវិញការដាក់ច្បាប់អាជ្ញាសឹករយៈពេលខ្លីរបស់លោក។

លោក Yoon កាលពីថ្ងៃព្រហស្បតិ៍ បានបដិសេធសំណើរបស់តុលាការក្នុងការដាក់ឯកសារ ក៏​ដូច​ជា​ការ​កោះហៅដោយក្រុមស៊ើបអង្កេត ក្នុងសំណុំរឿងព្រហ្មទណ្ឌដាច់ដោយឡែក ជុំវិញការ​ប្រកាស​ច្បាប់​អាជ្ញាសឹកកាលពីថ្ងៃទី០៣ ធ្នូ ដោយទាក់ទាញការរិះគន់ សូម្បីតែពីសមាជិក​មួយ​ចំនួន​នៃ​បក្សរបស់ខ្លួន។

ក្រឹត្យច្បាប់អាជ្ញាសឹកដែលមិននឹកស្មានដល់ និងចលាចលនយោបាយយ៉ាងឆាប់រហ័ស បានធ្វើឱ្យប្រទេសជាតិ និងទីផ្សារហិរញ្ញវត្ថុភ្ញាក់ផ្អើល បង្កការរំជើបរំជួលដល់សម្ព័ន្ធមិត្តសំខាន់ៗដូចជាសហរដ្ឋអាមេរិក និងអឺរ៉ុប ដែលបានមើលឃើញលោក Yoon ជាដៃគូដ៏រឹងមាំក្នុងកិច្ចប្រឹងប្រែងជាសាកលដើម្បីទប់ទល់នឹងប្រទេសចិន រុស្ស៊ី និងកូរ៉េខាងជើង។

វិបត្តិកាន់តែខ្លាំងឡើងក្នុងសប្តាហ៍នេះ នៅពេលគណបក្សប្រឆាំង ប្រជាធិបតេយ្យ បានប្តេជ្ញាចោទប្រកាន់ទម្លាក់តំណែងលោកនាយករដ្ឋមន្ត្រី Han Duck-soo ដែលកំពុងកាន់តំណែងជាប្រធានាធិបតីស្តីទី បន្ទាប់ពីលោកបដិសេធការអំពាវនាវឱ្យចាត់តាំងចៅក្រម ៣រូបភ្លាមៗទៅតុលាការធម្មនុញ្ញដើម្បីបំពេញតំណែងទំនេរ៕