ទីភ្នាក់ងារសារព័ត៌មានរដ្ឋ RIA របស់រុស្ស៊ី ដកស្រង់សម្តីឯកអគ្គរដ្ឋទូតរបស់ទីក្រុងមូស្គូ ប្រចាំទីក្រុងប៉េកាំង បាននិយាយនៅព្រឹកថ្ងៃសុក្រ (២៧ ធ្នូ) នេះថា ប្រធានាធិបតីចិន លោក ស៊ី ជីនពីង នឹងធ្វើទស្សនកិច្ចទៅរុស្ស៊ី នៅឆ្នាំ២០២៥។

លោកឯកអគ្គរដ្ឋទូត អ៊ីហ្គោ ម័រហ្គូលូវ (Igor Morgulov) បានប្រាប់ RIA ថា "សម្រាបចំណងទ្វេភាគីកាន់តែរឹងមាំ ផែនការសមស្របកំពុងត្រូវបានគូរឡើងយ៉ាងសកម្ម ហើយអ្វីដែលអាចប្រាប់បានគឺថា ប្រធាននៃសាធារណៈរដ្ឋប្រជាមានិតចិន ត្រូវបានរំពឹងថានឹងនៅកាន់ប្រទេសរុស្ស៊ី នៅឆ្នាំក្រោយនេះ"។

ក្រសួងការបរទេសចិន មិនបានឆ្លើយតបភ្លាមៗចំពោះសំណើសុំការបញ្ជាក់ទេ។

មេដឹកនាំរុស្ស៊ី លោក វ្ល៉ាឌីមៀ ពូទីន បានទៅបំពេញទស្សនកិច្ចនៅចិន ក្នុងខែកុម្ភៈ ឆ្នាំ២០២២ ដោយប្រកាសភាពជាដៃគូ "គ្មានដែនកំណត់" ប៉ុន្មានថ្ងៃប៉ុណ្ណោះមុនពេលលោកបញ្ជូនទាហានរាប់ម៉ឺននាក់ចូលអ៊ុយក្រែន។ លោកបាននៅទីក្រុងប៉េកាំង ម្តងទៀតកាលពីខែឧសភា ឆ្នាំមុន បន្ទាប់ពីការបោះឆ្នោតឡើងវិញ ដោយស្វាគមន៍ "យុគសម័យថ្មី" នៃទំនាក់ទំនងដែលផ្តោតលើការប្រឆាំងនឹងគោលនយោបាយសហរដ្ឋអាមេរិក។

លោក ស៊ី ត្រូវបានស្វាគមន៍នៅក្នុងវិមានក្រឹមឡាំងថាជា "មិត្តសម្លាញ់" ក្នុងឆ្នាំ២០២៣ បន្ទាប់ពីលោកទទួលបានអាណត្តិទី៣ ដែលមិនធ្លាប់មានពីមុនមក។ ចំពោះជម្លោះអ៊ុយក្រែន ប្រទេសចិន ដែលធ្វើការជាមួយប្រេស៊ីល បានដាក់ចេញនូវផែនការសន្តិភាពសម្រាប់សង្គ្រាម ដោយអំពាវនាវឱ្យបង្កកសមរភូមិ និងគិតគូរពីផលប្រយោជន៍សន្តិសុខរបស់ភាគីទាំងពីរ។ រុស្ស៊ី បានបង្ហាញការគាំទ្រចំពោះសំណើនេះ៕