ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយនៅថ្ងៃព្រហស្បតិ៍ (២៦ ធ្នូ) ថា រុស្ស៊ីបើកចំហចំពោះសំណើរបស់ប្រទេសស្លូវ៉ាគី ក្នុងការធ្វើជាម្ចាស់ផ្ទះកិច្ចចរចាសន្តិភាពជាមួយអ៊ុយក្រែន ដើម្បីបញ្ចប់ជម្លោះ ដែលលោកលើកឡើងថា រុស្ស៊ីបានប្តេជ្ញាចិត្តក្នុងការបញ្ចប់។

លោក ពូទីន ដែលសប្តាហ៍នេះធ្វើជាម្ចាស់ផ្ទះទទួលនាយករដ្ឋមន្រ្តីស្លូវ៉ាគី លោក រ៉ូប៊ឺត ហ្វីកូ (Robert Fico) នៅវិមានក្រឹមឡាំង បាននិយាយថា លោក Fico ដែលជាអ្នករិះគន់ខ្លាំងៗលើការគាំទ្រសហភាពអឺរ៉ុបសម្រាប់អ៊ុយក្រែន បានស្នើធ្វើជាម្ចាស់ផ្ទះកិច្ចចរចារវាងរុស្ស៊ី និងអ៊ុយក្រែន ហើយយើងមិនប្រឆាំងទេ ព្រោះស្លូវ៉ាគី ប្រកាន់ជំហរអព្យាក្រឹតរហូតមក។

ស្លូវ៉ាគី ត្រូវបានគេមើលឃើញថាជាអ្នកលេចធ្លោមួយក្នុងបណ្ដារដ្ឋសមាជិកសហភាពអឺរ៉ុបកណ្តាល និងខាងកើត ដែលមានការសង្ស័យចំពោះជំនួយអ៊ុយក្រែន និងគាំទ្រការចរចាជាមួយរុស្ស៊ី។

ប្រធានាធិបតីអ៊ុយក្រែន លោក Volodymyr Zelenskiy បានរិះគន់ស្លូវ៉ាគីជាច្រើនដង ដែលមានព្រំប្រទល់ជាប់នឹងអ៊ុយក្រែន ចំពោះសំឡេងមិត្តភាពដែលលោក Fico បានធ្វើចំពោះរុស្ស៊ី ចាប់តាំងពីឡើងកាន់អំណាចក្រោយការបោះឆ្នោតក្នុងឆ្នាំ ២០២៣ មក។ លោក ពូទីន បាននិយាយម្តងហើយម្តងទៀតថា រុស្ស៊ីបើកទូលាយក្នុងការចរចាដើម្បីបញ្ចប់ជម្លោះជាមួយទីក្រុងគីវ ប៉ុន្តែទោះជាយ៉ាងណា ខ្លួនក៏នឹងសម្រេចបាននូវគោលដៅរបស់ខ្លួននៅអ៊ុយក្រែន៕