ប្រធានគ្រូពេទ្យកុមារនៅមន្ទីរពេទ្យភាគខាងត្បូងនៃតំបន់ហ្កាហ្សា បានប្រាប់សារព័ត៌មាន AFP ថា ទារក ៣នាក់បានស្លាប់ដោយសារ "សីតុណ្ហភាពធ្លាក់ចុះខ្លាំងពេក" ក្នុងសប្តាហ៍នេះ ខណៈទឹកដីប៉ាឡេស្ទីនដែលបំផ្លិចបំផ្លាញដោយសង្រ្គាមមួយនេះ បានគ្របដណ្ដប់ដោយរដូវរងាដ៏ត្រជាក់ ស្របពេលកង្វះខាតបរិក្ខាវេជ្ជសាស្រ្តធ្ងន់ធ្ងរ។

ក្នុងករណីចុងក្រោយបំផុត លោកវេជ្ជបណ្ឌិត Ahmed al-Farra នៃមន្ទីរពេទ្យ Nasser ក្នុងទីក្រុង Khan Younis និយាយថា ទារិកាអាយុ ៣សប្តាហ៍ម្នាក់ "ត្រូវបាននាំយកទៅបន្ទប់សង្គ្រោះបន្ទាន់ ដោយកម្ដៅក្នុងខ្លួនធ្លាក់ចុះយ៉ាងធ្ងន់ធ្ងរ រួចហើយក៏បានស្លាប់"។

លោកបន្តថា "ទារកអាយុ ៣ថ្ងៃម្នាក់ និងទារកម្នាក់ទៀតអាយុតិចជាងមួយខែ ក៏បានស្លាប់បន្ទាប់ពីទប់ទល់នឹងសីតុណ្ហភាពដ៏ត្រជាក់នេះមិនបាន"។ យោងតាមសេវាអាកាសធាតុរបស់អ៊ីស្រាអែល សីតុណ្ហភាពនៅតំបន់ហ្កាហ្សា ក្នុងប៉ុន្មានថ្ងៃថ្មីៗនេះ មានកម្រិតទាបរហូតដល់ ៨អង្សាសេនៅពេលយប់។

វេជ្ជបណ្ឌិតរូបនោះបន្ថែមថា "នេះគឺដោយសារតែការពិតដែលថាពួកគេរស់នៅក្នុងតង់" ដោយសំដៅទៅលើជនភៀសខ្លួនប៉ាឡេស្ទីន ក្នុងសង្រ្គាមជាង ១៤ខែ នៅក្នុងតំបន់ហ្កាហ្សា ដែលជ្រកកោននៅក្នុងជំរំបណ្តោះអាសន្ន និងពុំមានជំនួយស្បៀងអាហារ ឬសម្ភារៈផ្សេងទៀតគ្រប់គ្រប់ ដើម្បីទប់ទល់នឹងរដូវរងាដ៏កាចសាហាវនេះ៕