ស្វាយរៀង ៖ លោក គឹម សាវុធ ប្រធានមន្ទីរធនធានទឹកនិងឧតុនិយមខេត្តស្វាយរៀង នៅថ្ងៃទី២៧ ខែធ្នូ ឆ្នាំ២០២៤នេះ បានប្រាប់ទូរទស្សន៏ BTV តាមរយះសារតេឡេក្រាមអោយដឹងថា នៅរដូវប្រាំងឆ្នាំនេះ មន្ទីរធនធានទឹកនិងឧតុនិយមខេត្ត បានត្រៀមបំរុងទឹកផ្តល់ជូនពលរដ្ឋ ប្រើប្រាស់លើការងារបង្កបង្កើនផលចំនួនប្រមាណ ៨លាន ៩សែនម៉ែត្រគីប ។

លោកបានបញ្ជាក់បន្ថែមថា គោលនយោបាយទឹក ក្រោមការដឹកនាំរបស់រាជរដ្ឋាភិបាល អឌឹតសម្តេចអគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីអាណត្តិទី៧  ស្វាយរៀង ក្នុងប៉ុន្មានឆ្នាំចុងក្រោយនេះបានទទួលប្រពន្ធ័ធារាស្ត្រ តាមរយះក្រសួងធនធានទឹកនិងឧតុនិយម ទាំងតូច ធំ ចំនួន១៤ស្ថានីយ៏   ពីលើប្រភពទឹកធម្មជាតិទន្លេ ព្រែក បឹង និងអូរ ដែលតភ្ជាប់ ចេញពីប្រភពទឹកក្នុងប្រទេស និងតាមខ្សែបន្ទាត់ព្រំដែនរួមជាមួយនិងវៀតណាម សម្រាប់អោយកសិករទាញយកមកប្រើប្រាស់ផលិតស្រូវ បន្លែ ទាំងប្រាំងវស្សាក្នុងភូមិសាស្ត្រខេត្តបន្ថែមប្រមាណជាង៨លានម៉ែត្រគីបផងដែរ ។

ពាក់ពន្ធ័ទៅនិងការងារប្រើប្រាស់ទឹកបង្កបង្កើនផល ពលរដ្ឋរស់នៅភូមិកែវជះ ឃុំបន្ទាយក្រាំង ស្រុកកំពង់រោទ៏ លោកស្រីគុជ ង៉ោល និងលោកស្រី ខៀវ សុខនី បានមានចំណាប់អារម្មណ៏ ដោយគោរពថ្លែងអំណរគុណចំពោះ រាជរដ្ឋាភិបាល សម្តេចនាយរដ្ឋមន្ត្រី និងក្រសួងមន្ទីរពាក់ពន្ធ័ ដែល សម្តេច បានគិតគូរជីកស្ថាប្រឡាយនាំទឹកមកផ្តល់អោយពួកគាត់ប្រើប្រាស់បង្កបង្កើនផលគ្រប់គ្រាន់ ខណៈដែលពីមុនការងារបង្កបង្កើនផលបានប្រឈាមកង្វះទឹក ​។

តាមរបាយការណ៏របស់មន្ទីរកសិកម្មរុក្ខាប្រម៉ាញ់និងនេសាទខេត្ត គិតត្រឹមថ្ងៃទី២៣ ខែធ្នូ ឆ្នាំ២០២៤ កសិករស្វាយរៀង សម្រេចធ្វើស្រែប្រដេញទឹក និងស្រូវប្រាំង បានចំនួន១ម៉ឺន ៩ពាន់ ០៣៦ហិចតាស្មើនិង៩២.៨៦% នៃផែនការផលិតស្រូវរដូវប្រាំងឆ្នាំ២០២៤.២០២៥ចំនួន២ម៉ឺន៥០០ហិចតា ៕ ដោយ ៖ ភា សារឹត