ក្រុមអាជ្ញាធរបាននិយាយកាលពីថ្ងៃព្រហស្បតិ៍ថា ប្រទេសក្រិកបានទប់ទល់ទៅនឹងអាកាសធាតុសើមបណ្តាលមក ពីព្យុះមានឈ្មោះថា Elena ចាប់តាំងពីថ្ងៃបុណ្យណូអែល ដែលបណ្តាលឱ្យមានការរំខានដល់ការធ្វើចរាចរណ៍ និងទឹកជំនន់ នៅទូទាំងប្រទេស។

នៅទីក្រុងអាថែន(Athens) ប្រជាជននៅជាយក្រុងភាគខាងជើង និងខាងត្បូងជាច្រើន បានភ្ញាក់ឡើងឃើញមានភ្លៀងធ្លាក់ខ្លាំង ដែលបានជន់លិចលំនៅឋានរាប់សិបខ្នង និងបានហូរនាំយករថយន្តជាច្រើនគ្រឿង។

អង្គភាពពន្លត់អគ្គីភ័យ បានទទួលការហៅទូរស័ព្ទយ៉ាងតិច៤០ដង ដើម្បីបូមទឹកនិងយកដើមឈើដែលបានបាក់រលំ ចេញពីផ្លូវ។

ពហុកីឡដ្ឋានសន្តិភាព និងមិត្តភាព នៅតំបន់មាត់សមុទ្រភាគខាងត្បូងរដ្ឋធានីប្រទេសក្រិក នៅជិតកំពង់ផែ Piraeus ក៏ត្រូវបានជន់លិច ហើយអាជ្ញាធរកំពុងតែវាយតម្លៃពីការខូចខាត។ ផ្លូវទៅកាន់ភ្នំ Parnitha នៅជាយក្រុងភាគខាងជើង ចរាចរណ៍ត្រូវបានបិទដោយសារតែមានព្រិលធ្លាក់។

នៅប្រទេសក្រិកភាគកណ្តាល ការកកស្ទះចរាចរណ៍មានចម្ងាយរហូតដល់៥គីឡូម៉ែត្រ នៅជើងភ្នំ Parnassus ខណៈអ្នកឈប់សម្រាកជាច្រើន ព្យាយាមដើម្បីបានទៅដល់រមណីយដ្ឋានជិះស្គី។

នៅលើកោះ Evia ក្បែរទីក្រុង Athens ភ្លៀងធ្លាក់ខ្លាំងបានជន់លិចផ្នែកខ្លះនៃបណ្តាញផ្លូវ ហើយអាជ្ញាធរនៅតែមានការប្រុងប្រយ័ត្ន ខណៈទឹកទន្លេចាប់ផ្តើមហក់ឡើង។