ប្រទេសកូរ៉េខាងត្បូង បានបោះឆ្នោតចោទប្រកាន់ទម្លាក់តំណែងរបស់ប្រធានាធិបតីស្តីទី លោក Han Duck-soo ដោយដំណើរការនេះកើតមានឡើង ក្នុងរយៈ ២សប្តាហ៍បន្ទាប់ពីសភា បានបោះឆ្នោតចោទប្រកាន់ទម្លាក់តំណែងប្រធានាធិបតី លោក Yoon Suk Yeol ហើយនេះក៏កាន់តែធ្វើឲ្យប្រទេសនេះមានវិបត្តិនយោបាយធ្ងន់ធ្ងរឡើងៗ។

សមាជិកសភាសរុបចំនួន ១៩២នាក់ បានបោះឆ្នោត ដើម្បីចោទប្រកាន់រូបលោក ពោលគឺច្រើនជាង ១៥១សំឡេងដែលត្រូវការ ដើម្បីឲ្យសំណើនេះទទួលបានជោគជ័យ។

គួររំលឹកថា លោកនាយករដ្ឋមន្ត្រី Han បានចូលកាន់តំណែងនេះ បន្ទាប់ពីប្រធានាធិបតី លោក Yoon ត្រូវបានសភាចោទប្រកាន់ទម្លាក់ពីតំណែង ក្រោយពីមានការប៉ុនប៉ងមិនជោគជ័យរបស់លោក ក្នុងការដាក់ចេញច្បាប់អាជ្ញាសឹក កាលពីថ្ងៃទី៣ ខែធ្នូ។ លោក Han ត្រូវបានរំពឹងថា នឹងដឹកនាំប្រទេសចេញពីភាពចលាចលផ្នែកនយោបាយ ប៉ុន្តែសមាជិកសភាបក្សប្រឆាំង បានលើកឡើងថា លោកបានបដិសេធការទាមទារ ដើម្បីបញ្ចប់ដំណើរការចោទប្រកាន់ទម្លាក់តំណែងលើលោក Yoon។

ទិដ្ឋភាពច្របូកច្របល់ក្នុងសភា បានកើតមានឡើង អំឡុងការបោះឆ្នោត នាថ្ងៃសុក្រ (ទី២៧ ខែធ្នូ) នេះ។ សមាជិកសភាមកពីគណបក្សកាន់អំណាច គឺគណបក្សអំណាចប្រជាជន (PPP) របស់លោក Yoon និងលោក Han បានតវ៉ា បន្ទាប់ពីប្រធានរដ្ឋសភា លោក Woo Won-shik បានប្រកាសថា ត្រូវការតែ ១៥១សំឡេងប៉ុណ្ណោះ ដើម្បីអនុម័តសេចក្ដីស្នើច្បាប់ចោទប្រកាន់ទម្លាក់តំណែងនេះ។

នេះមានន័យថា ខុសពីការតម្រូវឲ្យមានចំនួន ២០០សំឡេង ដើម្បីចោទប្រកាន់លោក Yoon នាពេលនេះ មិនចាំបាច់មានការបោះឆ្នោតពីសមាជិកសភារបស់គណបក្សកាន់អំណាច ដើម្បីឲ្យលោក Han ត្រូវបានចោទប្រកាន់ក្នុងសភានោះឡើយ។

សមាជិកសភាគណបក្សកាន់អំណាច បានប្រមូលផ្តុំគ្នានៅកណ្តាលបន្ទប់បោះឆ្នោត ដោយស្រែកថា «មិនត្រឹមត្រូវ!» និង «បំពានអំណាច!» ជាការឆ្លើយតប និងបានអំពាវនាវឲ្យប្រធានសភាចុះចេញពីតំណែង។ ពួកគេភាគច្រើនបានធ្វើពហិការមិនចូលរួមការបោះឆ្នោតនេះទេ។ ក្រោយមានការបោះឆ្នោតទម្លាក់តំណែងនេះ រដ្ឋមន្ត្រីក្រសួងហិរញ្ញវត្ថុ លោក Choi Sang-mok នឹងត្រូវតែងតាំងជំនួសលោក Han ជាប្រធានាធិបតីស្តីទី៕