ក្រុមប្រឹក្សារដ្ឋមន្ត្រីនៃក្រុមប្រឹក្សាកិច្ចសហប្រតិបត្តិការឈូងសមុទ្រ (GCC) កាលពីថ្ងៃព្រហស្បតិ៍ បានជំរុញឲ្យភាគីស៊ីរី «ផ្តល់អាទិភាពដល់ផលប្រយោជន៍ជាតិ» និងបានអះអាងឡើងវិញនូវការគាំទ្រចំពោះអធិបតេយ្យភាពរបស់ប្រទេសលីបង់ ក្នុងអំឡុងពេលកិច្ចប្រជុំវិសាមញ្ញលើកទី ៤៦ របស់ខ្លួន នៅក្នុងប្រទេសគូវ៉ែត។

នៅក្នុងសេចក្តីថ្លែងការណ៍ដែលចេញផ្សាយដោយទីភ្នាក់ងារសារព័ត៌មានគូវ៉ែត រដ្ឋមន្ត្រីក្រសួងការបរទេសគូវ៉ែតលោក អាប់ឌុលឡា អាលី អាល់យ៉ាយ៉ា ( Abdullah Ali Al-Yahya) ដែលជាប្រធាននៃកិច្ចប្រជុំបានសង្កត់ធ្ងន់លើជំហរឯកភាពរបស់ GCC ស្តីពីឯករាជ្យភាព និងអធិបតេយ្យភាពរបស់ប្រទេសស៊ីរី ដោយបដិសេធការជ្រៀតជ្រែកពីបរទេស ក្នុងកិច្ចការស៊ីរី។

លោក អាល់យ៉ាយ៉ា បានជំរុញឲ្យក្រុមប្រឆាំងទាំងអស់ នៅក្នុងប្រទេសស៊ីរី ចាប់ផ្តើមដំណើរការនយោបាយឡើងវិញ ចូលរួមកិច្ចសន្ទនាគ្រប់ជ្រុងជ្រោយ និងផ្តល់អាទិភាពដល់ការឯកភាពជាតិ ដើម្បីស្តារសន្តិភាព និងស្ថិរភាព។

លោក បាននិយាយថា៖«តំបន់មជ្ឈិមបូព៌ា កំពុងជួបប្រទះបញ្ហាប្រឈម និងវិបត្តិដែលកំពុងកើនឡើងយ៉ាងឆាប់រហ័ស ដែលទាមទារឲ្យមានការពង្រឹងកិច្ចខិតខំប្រឹងប្រែង និងកិច្ចសហប្រតិបត្តិការរួមគ្នា។ ការសម្រេចបានសន្តិភាព នៅក្នុងប្រទេសស៊ីរី និងលីបង់ នឹងមានឥទ្ធិពលវិជ្ជមានទៅលើសន្តិសុខ និងស្ថិរភាពនៃរដ្ឋអារ៉ាប់ផ្សេងទៀត»។

ក្រុមប្រឹក្សានេះ បានជំរុញឲ្យមានកិច្ចសន្ទនាថ្នាក់ជាតិដ៏ទូលំទូលាយមួយ នៅក្នុងប្រទេសស៊ីរី និងអនុម័តវិធានការការពារជនស៊ីវិល ជំរុញការផ្សះផ្សាជាតិ និងរឹតបន្តឹងការកាន់កាប់អាវុធ។