ម៉ិកស៊ិក៖ ក្បួនក្រុមជនអន្តោប្រវេសន៍ និងអ្នកស្វែងរកសិទ្ធិជ្រកកោនរាប់ពាន់នាក់មកពីប្រទេសនៅអាមេរិកកណ្ដាល និងតំបន់សមុទ្រការ៉ាអ៊ីបបានបន្តដំណើរឡើងវិញ កាត់តាមប្រទេសម៉ិកស៊ិកភាគខាងត្បូងកាលពីថ្ងៃចន្ទ ទោះបីមានក្ដីបារម្ភថា ចំនួនពាក់កណ្ដាលនៃពួកគេអាចរងបួស ឬឈឺ រួមទាំងអ្នកមួយចំនួនកើតជំងឺគ្រុនឈាមផងក៏ដោយ។
កាលពីសប្ដាហ៍កន្លងទៅ ជនអន្តោប្រវេសន៍ប្រហែល ៣,០០០នាក់ភាគច្រើនជាស្ត្រី និងកុមារបានធ្វើដំណើរដោយថ្មើរជើងចម្ងាយផ្លូវជាង ១០០គីឡូម៉ែត្រពីទីក្រុង Tapachula នៅព្រំដែនរបស់ប្រទេសហ្គាតេម៉ាឡាឆ្លងកាត់កំដៅថ្ងៃក្ដៅខ្លាំង និងមេឃភ្លៀងពេលល្ងាច។ លោក Kabir Sanchez ជាវេជ្ជបបណ្ឌិតស្ម័គ្រមួយរូបដែលកំពុងជួយមើលថែសុខភាពជនអន្តោប្រវេសន៍ បន្ទាប់ពីសមាជិកក្រុមអន្តោប្រវេសន៍មានរបួសបាននិយាយថា លោក និងក្រុមការងាររបស់លោកបានជួយព្យាបាលមនុស្សរាប់សិបនាក់កាលពីថ្ងៃសៅរ៍ ដោយអ្នកខ្លះមានរបួសជើង អ្នកខ្លះមានបញ្ជាផ្លូវដង្ហើម ការឆ្លងជំងឺដង្កាត់ផ្សេងៗ និងស្ត្រីមានផ្ទៃពោះដែលប្រឈមនឹងការបាត់បង់កូនក្នុងផ្ទៃជាដើម។ លោកបានប្រាប់សារព័ត៌មាន Reuters តាមទូរស័ព្ទថា មនុស្សជាង ៥០% ក្នុងក្បួនជនអន្តោប្រវេសន៍ទាំងនោះបានធ្លាក់ខ្លួនឈឺ។
លោកថា សមាជិកក្រុមជនអន្តោប្រវេសន៍ផ្សេងទៀតអាចមានករណីឆ្លងវីរុសកូរ៉ូណា ប៉ុន្តែរដ្ឋាភិបាលពុំបានផ្ដល់ការធ្វើតេស្តរកវីរុស COVID-19 ជូនពួកគេនោះទេ។ កាលពីយប់ថ្ងៃអាទិត្យ ក្រុមជនអន្តោប្រវេសន៍បានសម្រាកនៅកណ្ដាលវាលក្រោមមេឃភ្លៀង ដែលកំពុងបង្អាក់ដំណើររបស់ពួកគេអំឡុងពេលថ្ងៃដោយសារបារម្ភពីបញ្ហាសុខភាព។ ភាគច្រើននៃជនអន្តោប្រវេសន៍ទាំងនោះកំពុងរត់គេចចេញពីភាពក្រីក្រ អំពើហិង្សា និងការប៉ះពាល់ដោយសារស្ថានភាពបរិស្ថាន ដែលពាក់ព័ន្ធនឹងបម្រែបម្រួលអាកាសធាតុនៅក្នុងប្រទេសកំណើតរបស់ខ្លួន។ ភាគច្រើនសង្ឃឹមថានឹងបានទៅដល់ព្រំដែនសហរដ្ឋអាមេរិក៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
