យោងតាមការអះអាងរបស់ក្រសួងសុខាភិបាលប៉ាឡេស្ទីន បានឲ្យដឹងថា នៅព្រឹកថ្ងៃសុក្រនេះ ជនប៉ាឡេស្ទីនត្រូវបានគេមើលឃើញដើររកតាមគំនរបាក់បែកអគារ បន្ទាប់ពីការវាយប្រហាររបស់អ៊ីស្រាអែលលើតំបន់រស់នៅអ្នកស្រុកនៅតំបន់ជាយក្រុង Sheikh Radwan ស្ថិតក្នុងទីក្រុងហ្កាហ្សា ដោយបានសម្លាប់មនុស្សជាច្រើននាក់ ។

លោក Sobh Halawa គឺជាជនប៉ាឡេស្ទីនម្នាក់ដែលបានបាត់បង់សាច់ញាតិរបស់លោកក្នុងការវាយប្រហារនេះ និយាយថា តាំងពីព្រឹកមកម្ល៉េះ ពួកយើងគ្មានឧបករណ៍ ឬសម្ភារៈអ្វីនោះទេ ពួកយើងមានតែប្រើដៃទទេររបស់ពួកយើង ដើម្បីទាញសាកសពចេញ សូម្បីមិនអាចទាញចេញសាកសពទាំងមូល ។

យោងតាមការអះអាងរបស់ក្រុមមន្រ្តីសុខភាពនៅក្នុងតំបន់បិទច្រកគ្រប់គ្រងដោយក្រុមហាម៉ាស់មួយនេះ បានឲ្យដឹងថា យុទ្ធនាការសឹករបស់អ៊ីស្រាអែលលើក្រុមហាម៉ាស់ ក្នុងតំបន់ហ្កាហ្សា បានសម្លាប់ជនប៉ាឡេស្ទីនជាង ៤៥.៣០០នាក់ ហើយភាគច្រើននៃពលរដ្ឋ ២,៣លាននាក់ ត្រូវបានជម្លៀសខ្លួន និងរស់នៅតាមគំនរបាក់បែក ។

សង្រ្គាមមួយនេះ ផ្តើមឡើងពីការវាយប្រហាររបស់ក្រុមហាម៉ាស់លើតំបន់សហគមន៍ភាគខាងត្បូងអ៊ីស្រាអែល កាលពីថ្ងៃទី ៧ ខែតុលា ឆ្នាំ ២០២៣ ដែលបានសម្លាប់មនុស្ស ១.២០០នាក់ និងមនុស្ស ២៥១នាក់ទៀត ត្រូវបានចាប់ធ្វើជាចំណាប់ថ្នូរ នាំយកទៅកាន់តំបន់ហ្កាហ្សា ៕