ប្រធានាធិបតីស៊ែប៊ី លោក Aleksandar Vucic បាននិយាយនៅក្នុងបទសម្ភាសន៍ជាមួយសារព័ត៌មាន Handelsblatt ថា ទីក្រុងប៉េកាំង អាចដើរតួជាអ្នកសម្រុះសម្រួល ក្នុងការចរចា ដែលមានគោលបំណងដោះស្រាយជម្លោះអ៊ុយក្រែនដោយសន្តិវិធី។

មេដឹកនាំស៊ែប៊ីរូបនេះ បានឆ្លើយតបទៅនឹងសំណួរអំពីឆន្ទៈរបស់ទីក្រុងប៉េកាំង ក្នុងការទទួលយកតួនាទីនេះ ថា៖«បន្ទាប់ពីការពិភាក្សារបស់ខ្ញុំជាមួយ [ប្រធានាធិបតីចិន] ស៊ី ជីនពីង ខ្ញុំជឿថា ប្រទេសចិនទំនងជាសម្របសម្រួល»។ លោក Vucic ក៏បានបង្ហាញទស្សនៈថា៖«វានឹងជាការអភិវឌ្ឍជាវិជ្ជមាន»។

នាពេលមុននេះ រដ្ឋមន្ត្រីការបរទេសចិនលោក វ៉ាង យី (Wang Yi) បានលើកឡើងក្នុងជំនួបជាមួយ លោក Celso Amorim បេសកជនពិសេសរបស់ប្រធានាធិបតីប្រេស៊ីល នៅទីក្រុងញូវយ៉កថា ប្រទេសចិន ប្រេស៊ីល និងប្រទេសផ្សេងទៀតមកពីតំបន់កំពុងអភិវឌ្ឍន៍សកលលោកខាងត្បូង នឹងបង្កើតវេទិកា «មិត្តនៃសន្តិភាព» ដើម្បីគាំទ្រដំណោះស្រាយដោយសន្តិវិធីចំពោះវិបត្តិអ៊ុយក្រែន។

នៅក្នុងខែឧសភា បន្ទាប់ពីមានការពិគ្រោះយោបល់ លោក វ៉ាង យី និង លោក Celso Amorim បានចេញសេចក្តីថ្លែងការណ៍រួមចំនួន ៦ ដោយសង្កត់ធ្ងន់ថា ការសន្ទនា និងការចរចា គឺជាផ្លូវតែមួយគត់ ដើម្បីដោះស្រាយជម្លោះអ៊ុយក្រែន។ ប្រទេសចិន និងប្រេស៊ីល បានស្នើឲ្យរៀបចំសន្និសីទសន្តិភាពអន្តរជាតិ «នៅពេលវេលាត្រឹមត្រូវ» ដោយធានាឲ្យមានការចូលរួមស្មើគ្នាពីគ្រប់ភាគី ដើម្បីពិភាក្សាអំពីសំណើសន្តិភាព។ កាលពីខែកញ្ញា អនុរដ្ឋមន្ត្រីការបរទេសរុស្ស៊ីលោក Sergey Ryabkov បាននិយាយថា ទីក្រុងមូស្គូ បានស្វាគមន៍ចំពោះគំនិតផ្តួចផ្តើមសន្តិភាពចិន-ប្រេស៊ីល។