ប្រធានាធិបតីអាល្លឺម៉ង់ លោក Frank-Walter Steinmeier នៅថ្ងៃសុក្រ (ទី២៧ ខែធ្នូ) នេះ បានសម្រេចរំលាយសភាជាន់ទាបរបស់ប្រទេស ដើម្បីបើកផ្លូវឲ្យមានការបោះឆ្នោតមុនអាណត្តិ នៅថ្ងៃទី២៣ ខែកុម្ភៈ បន្ទាប់ពីមានការដួលរលំនៃរដ្ឋាភិបាលចម្រុះ ៣គណបក្សរបស់អធិការបតី លោក Olaf Scholz។

គួររំលឹកថា Scholz បានបរាជ័យក្នុងការបោះឆ្នោតដកសេចក្ដីទុកចិត្ត នៅសភា កាលពីដើមខែនេះ បន្ទាប់ពីគណបក្សប្រជាធិបតេយ្យសេរី (FDP) របស់រដ្ឋមន្ត្រីហិរញ្ញវត្ថុ លោក Christian Lindner បានចាកចេញពីរដ្ឋាភិបាលចម្រុះដែលខ្វះសំឡេងភាគច្រើនដាច់ខាត ក្នុងអង្គនីតិបញ្ញត្តិ។

ការបោះឆ្នោតដកសេចក្ដីទុកចិត្តនោះ ក៏បានចាប់ផ្តើមឲ្យមានផងដែរនូវយុទ្ធនាការបោះឆ្នោតដ៏តានតឹង ដោយគូប្រជែងខាងអភិរក្សនិយម លោក Friedrich Merz ដែលការស្ទង់មតិបង្ហាញថា ទំនងជាអាចជំនួសតំណែងលោក Scholz អះអាងថា រដ្ឋាភិបាលដែលកំពុងកាន់អំណាច បានចេញច្បាប់ច្រើនជ្រុល និងរារាំងដល់កំណើនសេដ្ឋកិច្ច។

ក្រុមអភិរក្សមានជាង ១០ពិន្ទុលើសគណបក្ស SPD (សង្គមប្រជាធិបតេយ្យ) តាមការស្ទង់មតិភាគច្រើន។ ចំណែកគណបក្សស្តាំនិយមជ្រុល គឺបក្សជម្រើសផ្សេង សម្រាប់អាល្លឺម៉ង់ (AfD) នាំមុខបន្តិចលើគណបក្ស SPD របស់លោក Scholz ខណៈដែលគណបក្ស Greens ស្ថិតនៅលំដាប់ទី៤៕