ក្រសួងការបរទេសចិន នៅថ្ងៃសុក្រ (ទី២៧ ខែធ្នូ) នេះ បានប្រាប់ឲ្យដឹងថា ប្រទេសចិនបានដាក់ទណ្ឌកម្មក្រុមហ៊ុនឧស្សាហកម្មយោធាចំនួន៧ និងនាយកប្រតិបត្តិជាន់ខ្ពស់ពាក់ព័ន្ធជាច្រើនរូប ជុំវិញការផ្តល់ជំនួយ និងការលក់អាវុធរបស់សហរដ្ឋអាមេរិកទៅឲ្យកោះតៃវ៉ាន់។

ក្រុមហ៊ុនបុត្រសម្ព័ន្ធរបស់ក្រុម Boeing គឺ Insitu ក្រុមហ៊ុន Raytheon Canada ដែលជាសាខាក្រុមហ៊ុន RTX និងក្រុមហ៊ុន Raytheon Australia ក៏ដូចជាក្រុមហ៊ុន Hudson Technologies ស្ថិតក្នុងចំណោមក្រុមហ៊ុនដែលត្រូវបានចុះបញ្ជីទណ្ឌកម្មដោយក្រសួង នៅក្នុងសេចក្តីថ្លែងការណ៍មួយ។

គួរបញ្ជាក់ថា ថ្មីៗនេះ សហរដ្ឋអាមេរិកបានអនុម័តជំនួយផ្នែកការពារជាតិចំនួន ៥៧១.៣លានដុល្លារ សម្រាប់កោះតៃវ៉ាន់ បន្ទាប់ពីបានបន្តលក់អាវុធដែលមានតម្លៃប្រមាណជា ៣៨៥លានដុល្លារ។

ប្រទេសចិនបានអះអាងថា កោះតៃវ៉ាន់ដែលគ្រប់គ្រងតាមបែបប្រជាធិបតេយ្យ ជាដែនដីរបស់ខ្លួន ហើយមិនដែលបដិសេធពីការមិនប្រើប្រាស់កម្លាំង ដើម្បីក្រសោបយកកោះនេះឲ្យមកស្ថិតក្រោមការគ្រប់គ្រងរបស់ខ្លួនឡើយ។ កោះតៃវ៉ាន់ជំទាស់យ៉ាងខ្លាំង ចំពោះការទាមទារអធិបតេយ្យភាពរបស់ចិន ហើយលើកឡើងថា មានតែប្រជាជនកោះនេះប៉ុណ្ណោះដែលអាចសម្រេចអនាគតរបស់ពួកគេបាន។

សហរដ្ឋអាមេរិកត្រូវបានចងដោយច្បាប់ ក្នុងការផ្តល់ឲ្យកោះតៃវ៉ាន់នូវមធ្យោបាយ ដើម្បីការពារខ្លួន ទោះបីជាមិនមានទំនាក់ទំនងការទូតផ្លូវការ រវាងក្រុងវ៉ាស៊ីនតោន និងទីក្រុងតៃប៉ិក៏ដោយ។

ពាក់ព័ន្ធនឹងការដាក់ទណ្ឌកម្មនេះ ក្រសួងបានឲ្យដឹងថា វិធានការនេះនឹងនាំឲ្យមានការបង្កកទ្រព្យសម្បត្តិរបស់ក្រុមហ៊ុន និងនាយកប្រតិបត្តិ នៅក្នុងប្រទេសចិន ហើយហាមប្រាមអង្គភាព និងបុគ្គល នៅក្នុងប្រទេសចិនមិនឲ្យមានការជួញដូរ ឬសហការជាមួយស្ថាប័ន និងបុគ្គលទាំងនោះ៕