រដ្ឋមន្ត្រីក្រសួងយុត្តិធម៌អេស្តូនី បានប្រាប់ទីភ្នាក់ងារសារព័ត៌មាន Reuters ថា ច្បាប់ដែនសមុទ្រអន្តរជាតិដែលមានអាយុកាលរាប់សតវត្សរ៍មកហើយនោះ ត្រូវតែធ្វើបច្ចុប្បន្នភាព ដើម្បីទប់ស្កាត់កុំឲ្យមានការខូចខាតដល់ហេដ្ឋារចនាសម្ព័ន្ធក្រោមសមុទ្រ ដូចជាខ្សែកាប និងបំពង់បង្ហូរប្រេង ឬឧស្ម័នជាដើម ដោយការលើកឡើងនេះ កើតមានបន្ទាប់ពីខ្សែកាបដែលតភ្ជាប់ប្រទេសនេះទៅហ្វាំងឡង់ បានរងការខូចខាតម្តងទៀតក្នុងសប្តាហ៍នេះ។

គួរបញ្ជាក់ថា កាលពីថ្ងៃព្រហស្បតិ៍ (ទី២៦ ខែធ្នូ) អាជ្ញាធរហ្វាំងឡង់ បានរឹបអូសនាវាដឹកប្រេងរបស់រុស្ស៊ី នៅសមុទ្របាល់ទិក ដោយសង្ស័យថា នាវានេះបានធ្វើឲ្យដាច់ខ្សែថាមពលក្រោមបាតសមុទ្រ ដែលតភ្ជាប់ហ្វាំងឡង់ និងអេស្តូនី នៅមួយថ្ងៃមុននោះ ហើយក៏សង្ស័យថា នាវានេះបានធ្វើឲ្យខូច ឬដាច់ខ្សែអ៊ីនធឺណិតចំនួន ៤ខ្សែផងដែរ។

ហើយនៅថ្ងៃសុក្រ (ទី២៧ ខែធ្នូ) កងទ័ពជើងទឹកអេស្តូនី បានចាត់វិធានការ ដើម្បីការពារខ្សែថាមពល។ រដ្ឋាភិបាលអេស្តូនី បានសម្រេចដាក់ពាក្យទៅអង្គការដែនសមុទ្រអន្តរជាតិត្រឹមខែកុម្ភៈ ដើម្បីសុំធ្វើបច្ចុប្បន្នភាពច្បាប់ដែនសមុទ្រ ដែលខ្លួនលើកឡើងថា ច្បាប់ដែលមានបច្ចុប្បន្ន មិនបានជួយដោះស្រាយការខូចខាតក្រោមបាតសមុទ្រនោះឡើយ។

រដ្ឋមន្ត្រីក្រសួងយុត្តិធម៌ លោកស្រី Liisa Pakosta បាននិយាយនៅក្នុងបទសម្ភាសន៍មួយថា៖ «យើងចាប់អារម្មណ៍ ក្នុងការជំរុញសហគមន៍ដែនសមុទ្រអន្តរជាតិឲ្យកែប្រែ ឬធ្វើទំនើបកម្មច្បាប់ដែនសមុទ្រអន្តរជាតិ»។

លោកស្រីបានបន្ថែមថា ការធ្វើឲ្យមានភាពច្បាស់លាស់ ចំពោះច្បាប់នេះ ស្តីពីរបៀបដែលប្រទេសនានា ត្រូវដោះស្រាយជាមួយនឹងករណីខូចខាតក្រោមបាតសមុទ្រ នឹង «កាត់បន្ថយ» ឱកាសនៃការមានជម្លោះណាមួយដែលបញ្ចប់នៅតុលាការអន្តរជាតិ៕