យោងតាមការអះអាងរបស់ក្រុមជំនួយជនអន្តោប្រវេសន៍ Walking Borders បានឲ្យដឹងថា មនុស្សច្រើនបំផុតជាប់កំណត់ត្រា ១០.៤៥៧នាក់ ឬស្មើនឹងជិត ៣០នាក់ក្នុង ១ថ្ងៃ បានស្លាប់ ពេលពួកគេប៉ុនប៉ងធ្វើដំណើរទៅដល់ប្រទេសអេស្ប៉ាញក្នុងឆ្នាំ ២០២៤នេះ ។

នៅក្នុងរបាយការណ៍ប្រចាំឆ្នាំរបស់ខ្លួនដែលបានបញ្ចេញនៅក្នុងសប្តាហ៍នេះ ក្រុម Walking Borders បាននិយាយថា ជនអន្តោប្រវេសន៍ ៩.៧៥៧នាក់ បានស្លាប់នៅក្នុងសមុទ្រ ក្នុងឆ្នាំ ២០២៤ ពេលពួកគេព្យាយាមទៅដល់ប្រជុំកោះ Canary របស់អេស្ប៉ាញ ដោយចេញដំណើរពីតំបន់ឆ្នេរមហាសមុទ្រអាត្លង់ទិករបស់អាហ្វ្រិក ។

យោងតាមការអះអាងរបស់ក្រុមកាកបាទក្រហម បានឲ្យដឹងថា មនុស្សម្នាក់ បានស្លាប់នៅក្នុងចំណោមមនុស្ស ៣០០នាក់ ដែលបានថ្វើដំណើរមកដល់តាមទូកចំនួន ៣គ្រឿងនៅថ្ងៃសុក្រនេះ នៅលើកោះ El Hierro ស្ថិតក្នុងប្រជុំកោះ Canaries ។

ផ្លូវអន្តោប្រវេសន៍តាមសមុទ្រអាត្លង់ទិកចេញពីតំបន់ឆ្នេរអាហ្វ្រិកខាងលិចមកកាន់ប្រជុំកោះ Canaries របស់អេស្ប៉ាញតាមធម្មតាត្រូវបានប្រើប្រាស់ដោយជនអន្តោប្រវេសន៍អាហ្វ្រិកដែលព្យាយាមទៅដល់ដីគោកអេស្ប៉ាញនោះ ត្រូវបានគេមើលឃើញហក់ឡើងខ្ពស់ក្នុងឆ្នាំនេះ ក្នុងនោះមនុស្ស ៤១.៤២៥នាក់ បានធ្វើដំណើរមកដល់ចន្លោះខែមករា និងខែវិច្ឆិកា ឆ្នាំ ២០២៤ ពោលគឺមានចំនួនច្រើនជាងកំណត់ត្រាកាលពីឆ្នាំមុនដែលមានចំនួន ៣៩.៩១០នាក់ ។

ជម្លោះជាច្រើនឆ្នាំនៅក្នុងតំបន់ Sahel រួមទាំងនៅប្រទេសម៉ាលី ការគ្មានការងារធ្វើ និងផលប៉ះពាល់ដោយសារបម្រែបម្រួលអាកាសធាតុលើសហគមន៍កសិកម្ម ស្ថិតក្នុងចំណោមហេតុផលជាច្រើនដែលនាំឲ្យមនុស្សធ្វើដំណើរឆ្លងកាត់សមុទ្រដ៏គ្រោះថ្នាក់ទៅកាន់ដីគោកអេស្ប៉ាញ ។

យោងតាមការអះអាងរបស់ Walking Borders បានឲ្យដឹងថា ផ្លូវមហាសមុទ្រអាត្លង់ទិក ដែលរួមទាំងចំណុចចាកចេញពីប្រទេសសេណេហ្គាល់ ហ្គាំប៊ី ម៉ូរីតានី និងម៉ារ៉ុក គឺជាផ្លូវស្លាប់មនុស្សច្រើនបំផុតរបស់ពិភពលោក ៕