្នកដំណើរម្នាក់នៅលើយន្តហោះក្រុមហ៊ុនអាកាសចរណ៍អាស៊ែរបៃហ្សង់ដែលបានធ្លាក់ក្នុងប្រទេសកាហ្សាក់ស្ថាន បានប្រាប់សារព័ត៌មានរ៉យទ័រថា លោកបានលឺសំឡេងប៉ះទង្គិចខ្លាំងមួយ នៅពេលដែលយន្តហោះបានទៅជិតដល់គោលដៅដំបូងរបស់វានៅទីក្រុងGrozny ភាគខាងត្បូងប្រទេសរុស្ស៊ី។

ជើងហោះហើរ J2-8243 បានធ្លាក់កាលពីថ្ងៃពុធ ទី២៥ ខែធ្នូ ដោយមានអគ្គិភីយឆាបឆេះនៅជិតទីក្រុង Aktau ក្នុងប្រទេសកាហ្សាក់ស្ថាន បន្ទាប់ពីបានបង្វែរទិសដៅពីតំបន់មួយនៅភាគខាងត្បូងប្រទេសរុស្ស៊ី ជាកន្លែងដែលទីក្រុងមូស្គូ បានប្រើប្រាស់ប្រព័ន្ធការពារដែនអាកាសដដែលៗប្រឆាំងយានដ្រូនរបស់អ៊ុយក្រែន។

មនុស្សយ៉ាងហោចណាស់ ៣៨ នាក់បានស្លាប់ ខណៈមនុស្ស២៩នាក់ទៀតនៅរស់រានមានជីវិត។

រុស្ស៊ី បាននិយាយថា វាជារឿងសំខាន់ក្នុងការរង់ចាំការស៊ើបអង្កេតជាផ្លូវការក្នុងការបញ្ចប់ការងាររបស់ខ្លួន ដើម្បីយល់ពីអ្វីដែលបានកើតឡើង។

ប្រភពព័ត៌មានចំនួនបួនដែលដឹងច្បាស់អំពីការរកឃើញបឋមនៃការស៊ើបអង្កេតរបស់ប្រទេសអាស៊ែបៃហ្សង់លើមហន្តរាយនេះបាននិយាយថា ប្រព័ន្ធការពារដែនអាកាសរបស់រុស្ស៊ី បានបាញ់ទម្លាក់យន្តហោះដោយការភ័ន្តច្រឡំ។

ក្រុមហ៊ុនអាកាសចរណ៍អាស៊ែរបៃហ្សង់(Azerbaijan Airlines) បានផ្អាកជើងហោះហើរជាច្រើនទៅកាន់ទីក្រុងនានារបស់រុស្ស៊ី កាលពីថ្ងៃសុក្រ និងបាននិយាយថា ខ្លួនបានចាត់ទុកថាការធ្លាក់យន្តហោះនេះគឺបណ្តាលមកពីអ្វីដែលខ្លួនហៅថា «ការជ្រៀតជ្រែកដោយវត្ថុមានរូប និងបញ្ហាបច្ចេកទេសពីខាងក្រៅ» ។