ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃសុក្រថា កងទ័ពកូរ៉េខាងជើងដែលត្រូវបានដាក់ពង្រាយនៅក្នុងតំបន់ Kursk របស់រុស្ស៊ី កំពុងទទួលរងការបាត់បង់យ៉ាងច្រើន ហើយពុំត្រូវបានការពារដោយកងកម្លាំងរុស្ស៊ីដែលពួកគេកំពុងប្រយុទ្ធរួមជាមួយនោះទេ។

លោក Zelenskiy នៅក្នុងសុន្ទរកថាតាមវីដេអូនៅពេលយប់ បាននិយាយថា ទាហានរុស្ស៊ី កំពុងបញ្ជូនកងទ័ពកូរ៉េខាងជើងចូលទៅក្នុងសមរភូមិដោយមានការការពារតិចតួចបំផុត ហើយកងទ័ពកូរ៉េខាងជើង កំពុងមានចំណាត់ការយ៉ាងខ្លាំងដើម្បីបញ្ចៀសការជាប់ពន្ធនាគារ។

លោកបាននិយាយថា យើងមើលឃើញថា ទាំងយោធារុស្ស៊ី ទាំងអ្នកត្រួតពិនិត្យកូរ៉េខាងជើងរបស់ពួកគេ គ្មានចំណាប់អារម្មណ៍ណាមួយក្នុងការធានាបានការរស់រានមានជីវិតរបស់ទាហានកូរ៉េខាងជើងទាំងនេះ ទេ។ 

របាយការណ៍ចារកម្មរបស់អ៊ុយក្រែន និងប្រទេសលោកខាងលិច បាននិយាយថា មានទាហានកូរ៉េខាងជើងប្រហែល ១២.០០០នាក់នៅក្នុងតំបន់ Kursk ជាតំបន់របស់រុស្ស៊ីនៅតាមព្រំដែនដែលកងកម្លាំងអ៊ុយក្រែន កំពុងកាន់កាប់ផ្នែកភាគច្រើននៃដែនដីនោះ បន្ទាប់ពីចាប់ផ្តើមការវាយលុកកាលពីខែសីហា។

កាលពីដើមសប្តាហ៍នេះ លោក Zelenskiy បាននិយាយថា កងទ័ពកូរ៉េខាងជើងជាង៣.០០០នាក់ ត្រូវបានសម្លាប់ ឬរងរបួស។ លោកបានអះអាងថា កងកម្លាំងអ៊ុយក្រែនបានត្រៀមចាប់ទាហានកូរ៉េខាងជើងមួយចំនួនដាក់ពន្ធនាគារ ប៉ុន្តែពួកគេបានរងរបួសធ្ងន់ធ្ងរ ហើយពុំអាចជួយសង្គ្រោះជីវិតពួកគេបាន។