រុស្សីបានអះអាងថា នឹងវាយប្រហារលើអាកាសយានដ្ឋានយោធាអ៊ុយក្រែន ខណៈអ៊ុយក្រែន បានបញ្ជាក់ថា ខ្លួនបានវាយប្រហាររុស្ស៊ីជាច្រើនលើក។ នេះបើយោងតាមសន្និសីទចុងក្រោយរបស់ភាគីទាំងពីរ កាលពីថ្ងៃសុក្រ។

ក្រសួងការពារជាតិរុស្ស៊ី បានបញ្ជាក់ក្នុងសន្និសីទសារព័ត៌មានមួយ កាលពីថ្ងៃសុក្រថា កងកម្លាំងរបស់ខ្លួនបានគ្រប់គ្រងកន្លែងតាំងទីលំនៅជាច្រើន កាលពីសប្តាហ៍មុន និងបានបើកការវាយប្រហាររាប់សិបលើកទៅលើរោងចក្រថាមពលឧស្សាហកម្មយោធារបស់អ៊ុយក្រែន ហេដ្ឋារចនាសម្ព័ន្ធនៅអាកាសយានដ្ឋានយោធា កន្លែងផលិតយានដ្រូន និងឃ្លាំងស្តុកទុកសម្ភារៈ ក្នុងចំណោមគោលដៅផ្សេងទៀត។

កងកម្លាំងការពារដែនអាកាសរុស្ស៊ី បានស្ទាក់ចាប់មីស៊ីលអ៊ុយក្រែន គ្រាប់បែកពីលើអាកាស គ្រាប់រ៉ូកែត និងយានដ្រូនរាប់រយគ្រឿង។ លើសពីនេះទៅទៀត កងកម្លាំងរុស្ស៊ី បានបន្តកំណត់គោលដៅលើបុគ្គលិក និងគ្រឿងយុទ្ធោបករណ៍របស់អ៊ុយក្រែន នៅក្នុងតំបន់ Kursk នៃប្រទេសរុស្ស៊ី។

នៅថ្ងៃដដែល អគ្គសេនាធិការនៃកងកម្លាំងប្រដាប់អាវុធអ៊ុយក្រែន បានរាយការណ៍ថា កងកម្លាំងអ៊ុយក្រែនបានចូលរួមក្នុងការប្រយុទ្ធចំនួន ១០០លើក ជាមួយកងកម្លាំងរុស្ស៊ី នៅជួរមុខ។ ស្ថានភាពជួរមុខនៅតែមានភាពស្មុកស្មាញ និងតានតឹង ដោយមានការប៉ុនប៉ងរបស់រុស្សី ក្នុងការរំលោភលើប្រព័ន្ធការពាររបស់អ៊ុយក្រែន ដែលត្រូវបានវាយបកដោយកងកម្លាំងអ៊ុយក្រែន។