បន្ទាប់ពីមានការទម្លាក់អតីតប្រធានាធិបតីលោក បាសា អាល់អាសាដ( Bashar al-Assad) កាលពីថ្ងៃទី០៨ ខែធ្នូ ប្រជាជនស៊ីរី កំពុងជួបនឹងបញ្ហាប្រឈមជាច្រើន នៅក្នុងទិដ្ឋភាពនយោបាយ ដែលវិវឌ្ឍន៍យ៉ាងឆាប់រហ័ស។

ខណៈពេលដែលអាជ្ញាធរគ្រប់គ្រងថ្មី ដែលដឹកនាំដោយក្រុម Hayat Tahrir al-Sham (HTS) បានសន្យាកំណែទម្រង់ និងផ្លូវទៅកាន់ស្ថិរភាព ឧប្បត្តិហេតុហិង្សា នៅតែបន្តកើតឡើង ដោយប្រជាពលរដ្ឋព្រួយបារម្ភយ៉ាងខ្លាំងអំពីអនាគតរបស់ពួកគេ។

នៅក្នុងព្រឹត្តិការចុងក្រោយបំផុតមួយ រដ្ឋបាលបណ្តោះអាសន្នរបស់ប្រទេសស៊ីរី បានដាក់បម្រាមគោចរ នៅក្នុងទីក្រុងជាច្រើន កាលពីថ្ងៃពុធ បន្ទាប់ពីការតវ៉ាដែលបង្កឡើងដោយវីដេអូអនឡាញ ដែលបង្ហាញពីការវាយប្រហារលើទីសក្ការបូជា Alawite ក្នុងទីក្រុងអាឡិបប៉ូ(Aleppo)។

រដ្ឋបាលបណ្តោះអាសន្ន ក៏បានប្រកាសពីយុទ្ធនាការសន្តិសុខ ដែលផ្តោតលើអ្វីដែលពួកគេហៅថា«អ្នកដែលនៅសល់ពីរបបមុន» និងនរណាម្នាក់ដែលញុះញង់ឲ្យមានសណ្តាប់ធ្នាប់ «ដោយមិនគិតពីក្រុមណា ឬប្រវត្តិបែបណានោះទេ»។ ពួកគេបានព្រមានថា អ្នកណាដែលកាន់អាវុធប្រឆាំងនឹងអង្គភាពសន្តិសុខ នឹងប្រឈមមុខនឹង«ការឆ្លើយតបយ៉ាងម៉ឺងម៉ាត់»។

ទន្ទឹមនឹងនេះដែរ ចៅក្រមបីនាក់ ត្រូវបានបាញ់សម្លាប់កាលពីថ្ងៃអង្គារ ដោយជនមិនស្គាល់មុខ នៅជិតភូមិ al-Rabi'ah នៅតំបន់ជនបទភាគខាងលិចនៃទីក្រុង Hama។ នេះបើយោងតាមក្រុមសង្កេតការណ៍សិទ្ធិមនុស្សស៊ីរី។