មន្ត្រីជាន់ខ្ពស់នៃកងទ័ពប៉ាគីស្ថាន បាននិយាយកាលពីថ្ងៃសុក្រថា យ៉ាងហោចណាស់បុគ្គលិកសន្តិសុខ ៣៨៣នាក់ និងភេរវករ ៩២៥នាក់ ត្រូវបានសម្លាប់ នៅក្នុងប្រតិបត្តិការចំនួន ៥៩.៧៧៥លើក ដែលបានធ្វើឡើង នៅទូទាំងប្រទេសប៉ាគីស្ថាន ក្នុងឆ្នាំ ២០២៤។

លោក Ahmed Sharif Chaudhry អគ្គនាយកនៃទំនាក់ទំនងសាធារណៈអន្តរសេវាកម្ម (ISPR) បានប្រាប់សន្និសីទសារព័ត៌មានមួយថា ក្នុងអំឡុងពេលប្រតិបត្តិការនោះ គោលដៅសំខាន់ចំនួន៧៣ពីក្រុម Tehreek-e-Taliban Pakistan និងក្រុមសកម្មប្រយុទ្ធផ្សេងទៀត ត្រូវបានសម្លាប់។ 

លោកបានបន្តថា៖«ឆ្នាំនេះ គឺចំនួនភេរវករច្រើនបំផុត ត្រូវបានសម្លាប់ ក្នុងរយៈពេល ៥ឆ្នាំកន្លងមកនេះ»។

ប្រធាន ISPR បាននិយាយថា ប្រតិបត្តិការចំនួន ១៧៩លើក ត្រូវបានធ្វើឡើងជារៀងរាល់ថ្ងៃ ដោយកងទ័ពប៉ាគីស្ថាន ភ្នាក់ងារអនុវត្តច្បាប់ និងភ្នាក់ងារស៊ើបការណ៍សម្ងាត់ និងនគរបាល ក្នុងអំឡុងឆ្នាំនេះ។

លោក Chaudhry បានបន្ថែមថា កងទ័ពប៉ាគីស្ថាន បានបោះជំហានយ៉ាងសំខាន់ ក្នុងកិច្ចខិតខំប្រឹងប្រែងប្រឆាំងភេរវកម្ម និងការគ្រប់គ្រងសន្តិសុខតាមព្រំដែន។

លោកបានបញ្ជាក់ថា យោធាប៉ាគីស្ថាន បានពង្រីកប្រតិបត្តិការរបស់ខ្លួន ដើម្បីប្រយុទ្ធប្រឆាំងនឹងការរត់ពន្ធ ការជួញដូរគ្រឿងញៀន ការលួចអគ្គិសនី និងការលួចរក្សាទុកសម្ភារៈផ្សេងៗ។